中美救市 浮起磚頭
2019/01/14 04:13:02 網誌分類: 經濟
美股又到業績敏感期
1月份美股表現不及港股，杜指上周五輕微收跌，中斷五連升。杜指上周五最多插203點，低見23798點，收市僅跌5點，報23995點，但仍失守24000點關；標普500指數微跌不足1點，收報2596點；納指則跌0.21%。一周累計，杜指升2.5%，標普指數升2.4%，納指上揚3.4%。
美股焦點落在，星巴克將會步蘋果後塵，警告在中國業務表現未如理想，消息曾拖累星巴克股價大瀉3.9%，收市僅回落0.7%。美股本周焦點落在政府停擺同企業業績。去年下半年起，全球經濟前景出現陰霾，對美國跨國企業影響逐步浮現。美國聲稱中國喺貿易順差下賺大錢，實際上美國跨國巨企好似蘋果、星巴克喺中國做生意，入口好，但全部都係高邊際利潤生意。好似一杯星巴克咖啡，入口材料只係幾毫子，但賣幾十元。不要說中美打貿易戰，內地受影響，學美國總統特朗普所講經濟好傷，美企喺內地利潤都受影響，對增長都有壓力，愈係中國份額大的公司，影響愈明顯，令中美兩國對貿易談判達成協議壓力增加。
現時中美貿談無具體內容，雙方分歧未明確解決，不過，股市通常走喺事實之前，若然情況明朗，股市已經反映。現在迷迷糊糊間，股市已經先一步上升，所以投資無得睇清楚落注，醒目資金走在現實之前，拉動港股六連升。
大孖沙轉軚無睇咁淡
中環茶友呢排話題之一，係近日地產股強勢。有同中環猛人好熟的茶友話，本來佢對未來兩年樓市睇法比較悲觀，主要係上屆梁振英政府大力推地，增加供應呢兩年就會出場，改變供求情況。但現在有兩個變化令他稍為樂觀，首先係中美目前經濟麻麻，經濟矛盾謀求緩和，維持經濟意願增強。其次係美國利息升勢開始有放慢跡象，所以令佢無睇得咁淡。說到底，樓市關乎經濟，政府要救市，先升起竟然係磚頭股。
茶友之言相信代表一些「大孖沙」看法。同一時間，也可以留意到大財團同地產股的動向。最近，長實（1113）提出重建嘉湖山莊酒店，可以興建5000個單位，等如半個嘉湖規模。若然這個超級項目闖關成功，等同兩個大型樓盤，而地價必然無投地咁貴。這些項目以前提出，相信唔容易闖關。然而，現在覓地小組搞個報告出來，講到土地異常短缺，實質卻無具體辦法增加短期供應。喺咁嘅情況下，禮失求諸野，政府無地，就要同發展商想辦法，否則根本無法解決私樓短缺難題。好似長實呢啲有潛在土地供應的大財團，就必然絞盡腦汁，出謀獻策，希望可以搵到利用手頭土地起樓的方案，所以估計天水圍起巨樓的個案會陸續有來。
本港土地不足，估計未來兩年係賣樓高峰期，發展商跟住會有大量資金回籠，屆時填充土地儲備，實行貨如輪轉。樓價不升，佢哋已經賺到笑，所以個別地產股好似信和（083）已經創出一年高位，龍頭地產股好似新地（016）都由低位反彈超過20%，往後有可能輪到二、三線地產股追落後。
房貸降準後轉趨寛鬆
本地地產股呢期先升，內房股上周都開始有好消息。內地傳媒報道，融360大數據研究院日前發佈的數據顯示，去年12月全國首套房貸款平均利率5.68%，按月下降0.53%，是全國首套平均利率23個月以來，首次出現下降，北上廣深集體回調。監測數據又顯示，去年12月全國二套房貸款平均利率為6.04%，較上月回落2個基點，是連續兩個月出現回落；12月二套貸款平均利率按月下降0.33%。這個跡象被視為係內地房地產政策出現放鬆跡象。業界覺得自降準後，銀行貸款政策會趨向寬鬆，包括開發貸款和個人按揭貸款，甚至是租賃市場貸款等，有助此類市場後續交易活躍。
內房股踏入今年，回升幅度與大市相約，但之前呢個板塊回調好深，大股下跌超過三、四成者比比皆是。若然大市保持平穩，內地為咗支撐經濟，房策就算不是大力扶持，只要轉得溫和一點，內房股都有追落後空間。
敢言高官個唱掀熱潮
覓地小組建議收回高球場，不少人認為做法杯水車薪，純屬民粹攞分的政治包裝。做過常務秘書長、現在擔任商會總裁的楊立門就公開撰文，話粉嶺高球場剛剛喺國際獲獎，點知跟住小組就話要拆場，簡直係國際笑話。
楊立門做常秘，喺俗稱AO的政務官體系中已經登頂，被視為叻仔，也以敢言著稱。他反對收場，在政經界當然有影響。他坦言，好似高球場這類議題根本不應該諮詢，因為他還提到在上屆政府時，最高領導層曾經想把啟德體育園用地都拿來起樓，結果喺體育界反對下，民政事務局局長曾德成力挺保留，最後成功爭取，如果當時又係做民調決定，咁啟德體育城肯定無得留低，現在已用作起樓。
有AO歌王之稱
楊立門當年選擇六十歲前退休，原因之一係佢有AO歌王之稱，希望爭取時間發展演藝事業。楊立門父親楊普禧，係六十年代著名編劇，代表作包括《大丈夫日記》、《電梯女郎》、《十八樓C座》等。佢幫兒子取名「立門」，正是取成語「程門立雪」之意，望子敬師篤學。
楊立門讀書叻，考入港大畢業後，1982年參加無線電視第一屆新秀歌唱大賽，與梅艷芳、張衞健等入選決賽。當佢收到政府通知取錄為政務官，便退出比賽，三十年後再續前緣唱歌。退休後佢同張德蘭辦過演唱會，亦為非牟利機構、大學籌款，或在公益活動義唱，同音樂人趙增熹多次合作。今個月尾佢會舉行兩場演唱會，仲請到麥潔文及陳志雲，作為今次演出擔任表演嘉賓，好多名人猛人都已經撲飛捧場。
陸羽仁
回應 (0)
我要發表