KellyChu - 灣仔會展「走塑」快人一步 | Executive日記

政府喺四月底推出外賣餐具走塑計劃。其實，好多有心機構，一早就全面改用循環再用嘅外賣餐具，灣仔會議展覽中心就係先行者。灣仔會展一姐梅李玉霞（見圖）話，佢哋一早就為外判商嘅工人提供可循環再用嘅不鏽鋼餐盒，而且使用麥萃或蔗渣等可降解飯盒，全面支持環保。

　　梅李玉霞話，為咗推動展覽會議業環保同減塑，會展中心引入可重用嘅不鏽鋼餐盒，截至上月，已經有10間外判機構支持，工人使用嘅不鏽鋼餐盒，約有2000個。Kelly見嘅餐盒又實用，用微波爐翻熱食物好方便，清洗容易又乾淨。

　　梅李玉霞仲話，會展中心早於2018年就推出「減塑行動」，所有餐廳及小食亭停用即棄塑膠餐具同塑膠飲管，並喺去年10月開始逐步轉用環保餐盒，包括可以自然分解嘅蔗渣餐盒、直接當廚餘回收嘅麥萃植物纖維餐盒，預計下月就成功全面「走塑」，比起政府要求飲食業「走塑」嘅步伐快好多，真係好有心。

KellyChu