報讀製作課程 盼成專業師傅 在囚人士重組人生學做點心
2019/01/18 04:12:23 網誌分類: 生活
現年四十四歲嘅阿華，喺塘福懲教所服刑。Kelly獲懲教署安排探望積極向上嘅在囚人士，同阿華傾過，佢本身對煮嘢食好有興趣，上年十二月喺獄中報讀咗「基礎點心製作課程」，仲有兩周就完成。佢話課程有啲難度，但學到好多食材嘅處理技巧、衛生、職安健等嘅知識，希望重投社會後，重回正軌，做個專業嘅點心師傅。
Kelly留意到阿華高大瘦削，雖然服緊刑，但面帶笑容，和藹可親。被問到報讀咗課程之後有冇心理上嘅轉變，他笑住話：「當然有，我好希望出番外面，可以整一籠美味嘅點心畀屋企人食，等佢地對我有番信心！」原來呀華結咗婚，一講到屋企人，笑得更開朗。被問到最想整邊一味點心畀屋企人，佢思前想後，最後笑住話：「鳳爪排骨！」
「基礎點心製作課程」由職業訓練局舉辦，每班有十五位學員參加。完成課程嘅學員可以考獲「基礎點心製作證書」同「食物衛生經理證書」，兩個證書皆受香港餐飲聯業協會及香港餐務管理協會行業認可。前兩日塘福懲教所舉辦「大師傅‧出點心」職業分享日，請嚟星級名廚黃亞保、蔡慶雄，為在囚人士分享工作心得，同時示範製作點心。
Kelly Chu
■塘福懲教所為在囚人士舉行星級點心師傅職業分享活動。
■在囚人士阿華報讀「基礎點心製作課程」，希望重回正軌，做個專業點心師傅。
回應 (0)
我要發表