鄭萃雯Keep住靚樣 潮玩十年前後挑戰 局長變髮源「頭」減廢
2019/01/18 04:12:27 網誌分類: 生活
一眾名人響應「10 Years Challenge」。無線新聞主播鄭萃雯喺個人專頁上載對比照，十年前後同樣坐喺一張電腦枱前，擺住同樣嘅pose，佢個樣一啲都冇變，仲係咁「省鏡」！網民留言大讚「點解我唔覺有變」、「仲靚咗」、「不老的傳說」。Kelly都好想向佢偷師，點先可以keep得咁好呀！
政制及內地事務局局長聶德權同環境局局長黃錦星都玩呢項挑戰，但「遭遇」大不同！聶德權上載自己十年前後嘅對比圖，話自己十年前做社署署長，成日探訪需要關懷嘅人，十年後工作崗位變咗，但關懷無變。Kelly見佢十年後個樣同髮線都冇乜變，認真厲害！
黃錦星就唔同喇！佢玩得仲勁，貼出自己三十年前同今日嘅對比圖，後生時佢頭髮濃密，話「眨眼三十幾年！年輕時，已酷愛郊遊、行山及露營」，不忘宣傳環保，「為環境揼少啲慳多啲」，樣貌變化不大，但由一頭黑髮變成一條青絲不留，網民關注到呢一點，留言話「局長果然從源『頭』減廢」、「用邊隻洗頭水？」，笑到Kelly碌地！
Kelly Chu
■鄭萃雯個樣一啲都冇變。
■聶德權頭髮依然濃密。
■黃錦星玩大啲，貼出三十年前嘅相同今天對比。
回應 (0)
我要發表