委內瑞拉風雲

2019/01/25 08:44:57 網誌分類: 經濟

25 Jan

週四美反覆靠穩，杜指微跌22點，收24553點，跌幅0.1%；標普500指數升0.1%；納指升0.7%。

美股先跌後回穩。美國商務部長羅斯昨日早上接受傳媒訪問時表示，中國與美國離達成貿易協議還有一段距離，可以用英哩來計算，皆因雙方仍有「非常之多」的問題需要解決。

正如Marketfiled Asset Management的行政總裁Michael Shaoul所講的，對美股而言，中美貿易糾紛，肯定是最大、而且難以解決的地緣政治壓力，美股本週走勢，大部分由關於中美貿易糾紛的標題所主導。羅斯在中美高層展開新一輪談判前夕潑冷水，不打擊到投資者的信心才怪。

3月初，就是中美貿易談判「死線」，現在的時間已所餘無幾，美國總統特朗普日前已經警告，如果在「死線」前未能達成協議，美國將對中國起碼一半以上的輸美貨品的加徵懲罰性關稅。

美股昨日先跌後回穩，算係勉強頂得住，主要係包括美國航空、Jetblue及德州儀器等多家美企都能夠派出好過市場預期的盈利報告，刺激股價顯著造好，美國航空、Jetblue升超過5%，而德州儀器升6.9%。另外，全球最大芯片製造商Intel於收市後公布業續，市場預期業績會不錯，股價升近4%，連帶追蹤芯片股的VanEcl Vectors半導體股票基金（ETF）亦抽升5.8%，創了2009年3月23日以來最大的單日升幅，標普500指數科技板塊升0.9%，係表現最好的板塊，頂住大市。不過，Intel在收市後公布的業績，令人失望，營收及盈利都不及預期，股價在延長時段一度更跌8%。估計整個科技板塊，今日亦會受到影響。

而支撐住美股的另一力量來自能源股，標普500指數能源股升0.6%，係表現第二好的板塊，主要受到紐約油價上升1%至53.13美元一桶帶動。

產油國委內瑞拉政治衝突升級，受到美國支持的反對派領袖兼國會議長瓜伊多自行宣誓就任臨時總統，現任總統馬杜羅直指這是非法行為，並且宣布和美國斷交。

委內瑞拉主要生產重油，需要深度煉製，煉油廠要將委內瑞拉重油與輕質油混合才可以產生高質有品，特別受出口制裁影響。

有傳出美國可能會制裁委內瑞拉的石原出口，消息刺激油價上升，因為美國已制裁伊朗，若再制裁委內瑞拉，將大大打亂全球油市

另外，投資者亦十分關注美國政府停擺事件，截至昨日，停擺已進入第34天。參議院昨日舉行重開政府部門的投票，但依然因票數不足，未能通過。由於特朗普未能拿到那57億美元興建美墨圍牆的撥款，所以不肯簽字通過9個政府部門的撥款預算，令到這些部門無錢運作要關門大吉，80萬名聯邦員工無工返、無糧出。

標普美國首席經濟學家博維諾在一份報告中已經預測，政府停擺至今，已經為經濟帶來60億美元的損失，已多過特朗普要求的建造圍牆預算。美國眾議院議長佩洛西繼續玩「小學雞」技倆，以不讓特朗普在國會發表國情咨文，直到特朗普肯讓政府重開為止，而特朗普卻一於「闊佬懶理」。

摩根士丹利行政總裁James Gorman昨日表示，事件對美國有非常負面的影響，如果政府繼續停擺多幾個月，將對美國經濟造成極端損害。不過，警告歸警告，大家亦心知肚明，但立法人員似乎對如何令政府重開一籌莫展。

美股受壓，中美貿易談判又不太順利，形成大市的上升阻力。

陸羽仁

回應 (12)

我要發表

animal666 2019/01/28 06:31:03 回覆

貿易談判難下重注
2019年01月28日

　　上周五港股大幅造好，恒指升448點，收報27569點，大市大有想喺中美貿易談判前夾淡倉，搶攻兩萬八的勢頭。

　　上周五市場主要炒幾方面消息，首先係人行宣佈創設央行票據互換工具(CBS)，有關措施是為銀行提供永續債流通性，增加市場認購意欲，支持銀行發債補充資金，提出可以用央票換銀行的永續債。

　　雖然中央並冇額外放水，但市場覺得央行支持銀行發永續債補充資金，等同間接寬鬆。人民幣兌美元升穿6.77關口，顯示市場看好中央呢項措施。股市因而炒升，內銀內險股升得比較厲害。

　　換永續債撐住銀行

　　其次，上周五是第二輪降準0.5個百分點的實施日，市場信心十足。內銀股造好，工行(1398) 升2.2%，報5.97元；建行(939) 升1.8%，報6.82元；中行(3988) 升2.6%，報3.59元；招行(3968) 升2.4%，報32.6元。由於中銀保監允許保險公司投資銀行永續債，保險股炒高，其中平保(2318) 見超過一個月高位，收報73.4元，升1.6%；國壽(2628) 再創一個月新高，收報19.68元，升4.2%。由於內銀內險股都是重磅藍籌股，因而拉動港股向上。

　　銀行銀根鬆動，市場聯想到的是內地樓市翻生，碧桂園(2007) 抽升5.5%，收報10.28元，成為表現最佳藍籌股；其他大型內房股亦造好，恒大(3333) 升4.6%，收報23.9元，萬科(2202) 升5.5%，收報29.8元；中海外(688) 升2.7%，收報28.2元。正如我之前所講，內地經濟唔好，反而係炒作理由，因為阿爺會不斷出招放水承托經濟，水多第一個受惠者就是股市。當然，也唔能夠排除有好友夾倉，推高恒指，殺死此前累積的大量淡倉。

　　上周五美股亦造好，杜指升183點，升幅0.8%，其中關鍵原因係美國總統特朗普終於頂唔住政府長期關門壓力，與民主黨達成讓政府重開三星期、再慢慢商討興建美墨圍牆撥款的臨時協議，特朗普先輸一局。民主黨控制咗眾議院，對於興建美墨圍牆寸步不讓；特朗普就因為面子問題，唔想全面放棄。

　　聯邦政府停擺一星期，就損失七億美元，美國政府已經停擺33日，創政府停擺最長紀錄。由中國副總理劉鶴領軍的中美貿易談判將於本周舉行，形勢比人強，特朗普好難兩條戰線都開打，惟有先同民主黨達成協議，等政府重開三星期。可以預計，民主黨最終唔會批出美墨圍牆嘅建造費，只係特朗普唔肯認輸，將事件拖延落去。

　　政府重開美股上揚

　　政府重開，是刺激美股上升最大因素，此外都有一啲中美貿易談判嘅所謂好消息支撐美股。美國財長努欽上周五對路透社話，佢對中美貿易談判有信心，因為談判一直進展良好。努欽一向係談判鴿派，但白宮內鷹派眾多，市場對努欽講話有正面反應，可能有啲「過敏」。就喺兩日前，美國商務部長羅斯仲話距離中美貿易達成協議仲有漫漫長路，可能係努欽想出嚟講啲正面嘢，沖淡羅斯講話嘅影響。

　　其實羅斯嘅講法比較具體，佢話中美貿易糾紛，唔係買啲大豆同天然氣就可以解決。中美貿易糾紛之間有三大問題，第一是3233億美元嘅美國對華貿易逆差；第二是中國的「中國製造2025」計劃會稱霸高科技產業，美國要保護自己的高科技產業；第三是美國企業在中國做生意的准入和知識產權問題。還有一個附加問題是美國想要有一個查證機制，年年去查中國是否遵守協議。

　　羅斯所講的「幾哩遠」，指的是中國願意多買美國貨，縮減貿易差距，但喺其他問題上，雙方仍有好大分歧。上周有美國兩艘軍艦駛入台灣海峽，好明顯係談判前向中國施壓手段。所以，本周副總理劉鶴赴美訪問，好難讓人下重注賭中美達成全面貿易協議。雙方能夠達成框架協議，有聯合聲明出嚟，表明雙方大幅收窄分歧，已經係現實上較好結局。差啲嘅結果係雙方連框架協議都冇，只話會繼續談判。港股喺中美貿易談判前大幅夾上，升得既高又急，要小心喺貿易談判結束後回吐。

　　換劉士余罪在市弱？

　　以目前情況嚟睇，好難落大注賭中美貿易談判會達成協議，真要賭的話，不如賭中國救市政策會逐步撐起中資股。周末傳來消息，內地證券市場一把手換人，中央任命中國證監會主席劉士余為全國供銷社總社黨組副書記、理事會主任；至於中證監主席一職，就由工商銀行董事長易會滿接棒。

　　有關劉士余去向，之前一度傳言，話劉士余將出任某省省委書記或某省省長，甚至具體到話劉士余曾有望接替上海市長應勇，又話佢可能到中投任職，結果係去咗做供銷總社黨組副書記，呢個當然不及做大省嘅一把手。

　　由此可見，阿爺對劉士余治下嘅證監會唔太滿意，一個說法係佢上任三年，股市仲跌咗不少。中證監換人，或者可以視為阿爺要搞起股市嘅一個指標。

　　O依家中國股票仍然比較便宜，例如追蹤國企股嘅恒生中國企業指數基金(2828) ，上周五收報109.9元，仲未突破上一浪12月初嘅小高位110元，估計呢次可能有機會略為升破呢個高位，然後回吐。恒生中國企業指數基金52周低位為今年一開始創出嘅98.85元，底部似乎已經確認。除非中美貿易談崩，否則應該唔會跌穿呢個位。如果呢一浪能夠升上112元水平，出現一個突破，就可以確認一個一級級向上走勢。大家可以等股價回落到105至107元左右吸納。中美貿易談判應該仍有波折，當出現障礙時，股市應該會出現較大調整，屆時就可以趁低吸納。

　　如果阿爺被迫放水，雖然唔會直接讓內房鬆綁，但內房其實是最受惠股份。有朋友喺碧桂園(2007) 1月14日大跌當日以9.2元買入，但收市時跌至9.08元，佢有啲滴汗，但喺短短十日已有12%升幅。朋友打算喺股價升15%時先沽一半，然後再觀望。我覺得呢個策略唔錯，碧桂園係內地第一隻房企，9至10元唔算太貴，現價7倍市盈率，4.7厘息率，長揸都可以。不過短期升得太急，沽走一半，等股價下跌時再買回，一半長揸一半游水，不失為一個明智做法。

　　要留意嘅係，碧桂園呢隻大型內房股股價咁平，當中自然潛藏一啲市場憂慮，包括房地產暴利時代是否可以繼續？中央會否持續打壓？公司多元化計劃能否成功？以及公司風險是否可控等。我問過一啲內地開發商對碧桂園睇法，佢哋嘅評價係碧桂園風險冇大家想像中咁大。

　　碧桂園風險不大

　　碧桂園賣樓周轉極快，買地三幾個月就可以開售。碧桂園喺馬來西亞有一個大項目，馬國首相馬哈迪重新上台時批評呢個項目，搞到中馬關係轉差，令人對碧桂園喺馬來西亞嘅投資有啲擔心。發展商朋友話，碧桂園合作夥伴係當地「州長」，非常有實力，加上碧桂園呢次係邊起邊售樓，起咗嘅樓都已經售出，形勢唔好都可以放慢興建，唔至於笮死資金。

　　O依家內地樓價回軟，喺中央打壓下，唔能夠期望會有過往嘅暴利。不過，房企仍然可以透過快速起樓賣樓，加快周轉降低風險。簡單嚟講，好似碧桂園呢類股份，大家唔需要擔心會執笠，甚至售樓數量都會只升不跌，只不過係售價冇以往咁靚仔，賺得冇咁多而已。所以喺低位買入，博下半年內地樓市好轉，內房股可以有比較大嘅復甦，係一個不俗投資。

　　習主席近期不斷話要有底線思維，指嘅係中美貿易戰不能假設一定會有好結果。中國尋求達成協議，但唔能夠作出超出原則嘅讓步，所以要做好談崩嘅打算，中國預咗要捱，政府都會不斷出招支撐經濟。有咗呢個底氣，中國先能夠同美國談判，希望可以爭取到一個雙贏結局。

　　今年買股要穩陣啲，關鍵係要控制注碼。只要睇美國就會知道，好多問題只繫於總統一念之間，人為因素太多，可測性比較低。

　　陸羽仁