31/1 一月效應~28000好淡角力

2019/01/31 21:21:33 網誌分類: 經濟

31 Jan

上証結束三連跌推動港股收復200天線, 創即月新高, 高開高收呈陽燭, 大舉屠熊

31/1 周四恒指收報27942, 升299點(最多上升368點)

國指收報11035, 升138點(最多上升176點), 國指跑贏恒指

一月效應好友大勝: 1月恒指升2097點, 月波幅3114點

聯儲局一如預期維持利率不變，並表示對未來利率調整保持耐心，並可能減慢縮表步伐，金融市場立即起飛, 美股顯著上升, 有調查顯示1月歐、美、英、日基金股票持倉創近一年高, 真係非常樂觀, 匯市表現利好港股, 美元及美國十年期債息雙雙下跌, 人民幣連升5日, 港匯走強, 連今早公布的1月官方製造業採購經理指數(PMI)都勝預期, 北水於1月下旬持續掃A股(帶動H股上), 除了因為A股低殘外, 亦係因為今年A股被納入環球指數, 所以老外要掃貨

好事約埋一齊, 利淡消息就扮睇唔到, 明益屠熊大鱷, 亦配合早前所說熱錢流入新興市場, 老外繼續掃A股, 其實以大鱷的能力, 今日升500點見28200屠熊不難, 但大鱷就係忍忍手今日唔殺上去住, 想引多些熊入局, 亦想預留多些水位俾二月上攻,

內銀內險資源商品A股爆升推動相關H股飛天, 係今日港股爆上28000/11000的功臣, 今個月港股報復式反彈, 恒指大升2096點(+8.1%), 由25846彈到上今日高位28011, 1月開局只係跌兩天就拗腰一升到月尾, 皆因當時港股處於大平賣的低水平, 但如今上到28000的4個月高位, 唔少股份純炒憧憬, 冇基本因素支持升過龍, 吸引力下降, 2月未必會否好似1月升得這麼一帆風順, 可能會震到失暈, 要留意人民幣會否於劉鶴訪美後掉頭回落, 因為今次港股升浪係跟住人仔升, 當美元上升.人仔下跌就會拖低港股,

~~~~~~~~~~~~~~~~~~~~~~~~~~~~~~~~~

28000 好淡角力

大鱷想養熊引淡就詐死玩窒窒步升, 今日明明應上28200, 但就刻意沖上28011急回, 淡友見28000打回頭就飛撲入市, 但卻忘記了第一次上破整數關口例牌一掂即回, 只係試水溫, 仲會有第二次上攻

貼價熊肥牛瘦, 大鱷流晒口水, 港股愈升愈有, 吸引貨少的股民追貨, 低位收夠貨的大鱷有得高位派貨真係肥過豬頭, 一如日前網誌所說，大鱷今日特登壓落去收28000樓下目的係預留多些水位俾2月, 唔係見頂, 閃上去28011只係試水溫，高位貼近28000可降低日後破頂的難度,

想令股民相信牛市重臨入市接貨的話, 2月就要挑戰正在下移的250天線(現處28444), 雙底量度升幅就要上29000, 不過要有強烈利好消息才能殺上去, 能否如願就要睇狂人及阿爺生唔生性, 以2000點月波幅計, 2月一係插穿27500見27000~27300, 一係升穿28500

雙底頸線27260, 中線量度升幅目標29624, 大市現受制於長期下降軌, 28200~28500阻力大, 由於普遍基金經理仍看好後市, 估計大市調整的話，大鱷會力守27300~27500，底線是27000

資金市通常會係升到你唔信, 而反彈上28000是在市場預期之內, 但唔少淡友仍未投降, 貼價有重倉熊，代表今日高位28011不會是頂, 要逼死淡友才會插，28000~28200有肥熊, 如果2月初港股續升, 就係連升6周, 到2月下旬(14~31/2)再爆上就要小心, 如果升埋11~15/2的一周就係連升7周, 而2018年恒指連升7周見大頂33484後就掉頭向下,

今日內銀內險資源商品A股爆升推動相關H股飛天, 但下周內地休市, A股就冇得升, 即係港股冇左推升助力, 有分析指當內銀飛天推高大市就係回調先兆, 短炒做好要執生, 現時仍有不少淡友或猶豫的投資者, 代表港股未見頂, 要留意當全城一面倒看上望, 牛牛大增, 淡友唔敢做淡就要逆向思維

~~~~~~~~~~~~~~~~~~~~~~~~~~~~~~~~~

長假期沽壓效應+超買

2月只得16.5個交易日, 市況必定會大幅波動, 港股已進入超買區, 而通常突破2X800關鍵位都會有後抽來下試支持力, 唔會升穿27800就一去冇回頭, 亦可順道落去測試27800來擴大2月波幅, 做完底然後再爆頂, 向上擴大月波幅, 有長假期因素, 未來幾日沽壓必定會增加, 如市強只會係即市調整或小幅下跌, 如大跌或連日下跌就係見頂訊號,

今日午後見沽壓, 表面上咬住27900/11000, 但其實多隻指標股已暗暗由高位回落, 表現欠佳, 可能有大鱷食胡或換馬落後股, 按照慣性走勢, 只要收27800樓上, 就代表隨時會上28000.28300.28500.... 真正阻力在28500, 呢個係超級大位, 要等到聚集大量肥熊才會上破, 上周五收27569/10873, 明日係周五畫圖日, 恒指連升5周已毫無懸念, 本周已經大升超過350點收陽收升, 就睇大鱷想點畫今個星期支陽燭, 會否忍忍手留多些水位俾下星期

一月升勢過急, 遺留太多上升裂口是後患, 今日的上升裂口27642~27773仍有可能會回補, 不過要有強烈利淡消息或有肥牛才會插穿27500, 如有利好消息就會爆上28000再創新高, 不過要小心高位亦會係一瞬即逝, 秒殺肥熊即回, 因為28200樓上只得瘦熊, 仲要拖多幾日養下先,

今日港股爆升雖然有大成交配合, 但有買當然亦有賣, 大成交亦同樣代表沽壓增加, 由低位彈逾3000點, 已有足夠水位俾大鱷轉身, 獲利沽壓出籠

本來月尾恒指通常係3升3跌, 但今次資金市就扭曲了慣性走勢, 最終係5升1跌, 反映買盤強勁, 估計當中有唔少淡友補空倉買盤, 看淡的股民開始跟風看好亦入市追貨, 形成購買力, 所以大市往往係一插即彈, 只係即市調整, 全月計恒指16升6跌, 好明顯係資金市, 不過按照慣性走勢, 如打破了月尾3升3跌的模式, 跌市就會順延到下個月初, 即係2月開局頭3天不會日日升, 會補跌

我們常以燈神的出入市時間來開玩笑, 但今次燈神入貨時間與我於一月上旬認為係資金市以及今年港股會熊轉牛不謀而合, 早前燈神看好港股已不斷入貨至近乎滿倉, 俾佢叻番一次, 但驕兵必敗, 一味向上望, 瞓身入滿倉，冇預留資金防黑天鵝就未免太進取, 可能我太保守啦！無論甚麼市況，我都不會滿倉

以大鱷操控港股的神級能力, 1月彈逾3000點, 其實繼續推上係易如反掌, 大鱷只係等淡友入局才殺上去, 但資金市熱錢來也匆匆去也匆匆, 就算要再升都可以震完倉再升過, 升到現水平燈神仍非常看好後市, 今日仲話不應畏高, 不要沽貨, 叫再追貨加倉,真喺要小心，因為以往當燈神滿倉非常樂觀就係大市回調訊號, 多數會反艇，肥青及沈大屍仍堅定不移看淡, 認為今年未見底, 換句話說, 兩位大淡友認為今年會插穿3/1/2019低位24896

${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$