適合年輕人奮鬥的平台
2019/02/01 04:13:48
網誌分類:
生活
今個星期,特首同我獲邀為一間新設喺旺角鬧市嘅電競館開幕主禮。電競館佔地約二萬五千平方呎,係亞洲最大嘅綜合電競館。呢間電競館係由三位年輕人創立。佢哋希望打造一個電競愛好者嘅聚腳地,除咗訓練電競生力軍之外,仲可以舉辦講座同專業電競比賽,嚟緊亦有不同賽事喺度舉行。另外,我都知道電競場館嘅牌照問題一直困擾業界,特首致辭時都提到要改善電競業界營商環境,希望政府快啲有好消息出台。
其實,旅發局過去已連續兩年舉辦香港電競音樂節,二○一七年嘅首屆盛事就成功帶嚟超過一億五千萬元嘅全球宣傳效益;去年我哋再接再厲,移師會展並展出多款最新電競遊戲同產品。不但吸引一班年輕朋友,亦為香港帶來唔少國際曝光。
近年政府積極推動創科發展,喺數碼港嘅電競場館亦密鑼緊鼓,相信將為年輕人提供更多發展。當然最希望將來我哋嘅年輕電競人才,可以喺國際舞台上為香港、為國家爭光。
林建岳博士
回應
(0)
我要發表