如果唔講手機...唔講科技...唔買野...

科技令生活方便, 揾資料同解決問題都快好多、容易好多~

但飛蚊症...

今日又揾左D資料, 應該係良性, 唔使理 (休息同對少D電子屏幕OK), 只需要習慣飛蚊既存在。

同埋... 同工作有關, 應該同電話關係少D, 雖然係因為工作更加狂督部機。

作為媽媽, 手機當然有好多仔仔既相啦~

之前份工既文件同資料, DELETE晒佢地!!! 冇眼屎乾淨盲!!!

仔仔既相, 2年冇拎去曬... 仔仔大得快, 多愁善感, 唧佢先笑...

好希望快D曬D靚相, 同仔仔重温以前既相令佢開心D。

手機成千上萬既SCREEN SHOTS... 反映左我每日既心態-

每日, 我會悶到揾好多資料/ 為左某D目的揾好多資料, 包活: 教仔/ 親子遊戲/ FASHION既野/ 返工相關既野/ 收納技巧...

其實放低部機, 呢D資料都可以嚮其他地方揾既。

其實放低部機, 煮個麵食, 會發現貴既煲蓋同煲身有特別曲線設計幫助隔左D麵水~

淘寶揾玩具... 咩咩STEM玩具... 原來燒餅細個時已有果D玩具?

只係大家覺得, 可以加個STEM字, 勁D, 多D人買, 賣貴D...

所有野, 包括求其一個上鏈既打鼓公仔, 通街有得賣, 都有STEM元素...

雪條棍可以做數棒, 真既銀仔可以用黎俾小朋友玩... 

雖然, 如果唔上網揾玩具, 我都冇咁多唸頭。

但係, 當日見到堆日本城現金券, 我真係拎左本玩具反斗城同宜家傢俬目錄同個仔玩買賣遊戲喎~

找錢既時候, 用雪花片做1蚊 (本來想雪花片做兩蚊, 樽蓋做1蚊, 至於毫子就用紙剪, 但物資有限, 仔仔又話唔使找錢咁富貴)~

第2日, 我揾到D銀包仔, 仔仔就知個買賣遊戲又多左野玩~ 感覺上, 佢咁玩仲開心過買玩具...有跡可尋:

有一晚, 仔仔唔小心踢跌左盒只玩過2次既新玩具, 跌左3次, 俾我鬧。我話, 你咁唔珍惜盒玩具, 唔俾你玩...

佢竟然話: 唔玩咪唔玩囉... 好野, 唔使玩...

其實果盒係MARBLE RUN, 要砌個旋轉滑梯城堡俾波子滾落黎既, 但佢未去到識砌, 次次要我砌左先, 可能冇咩成功感, 砌完只係望住波子落黎, 又冇咩特別, 佢玩係有D悶既。買賣遊戲就唔同, 有互動, 又可以講出想買咩, 點解想買, 仲可以認數字...訓練埋溝通、對答、禮貌~

最原始既野, 最簡單既野, 可能就係最幫到小朋友既野。而我, 都係覺得以前成日有得畫畫既日子比起督手機既日子開心得多。