12/2 部署上攻250天線屠熊

2019/02/12 20:26:57 網誌分類: 經濟

12 Feb

恒指低開高收呈陽燭, 貼價熊陣亡, 繼續尋頂屠熊之旅, 向28500進發

12/2 周二恒指收報27171, 升27點(最多上升76點, 一度下跌160點)

國指收報11044, 升27點(最多上升49點, 一度下跌52點), 國指跑贏恒指

滬深股通持續見大額資金凈流入內地股市, 老外繼續掃A股推動中港股市向上, 上証強勢突破2650, 底頂上移, 而且有大成交配合升勢, 有利進一步上攻, 阿爺密密推出救股市救經濟政策, 已經有分析師說上証今年會進入牛市, 而內地放水救市, 游資充裕, 資金流入炒港股, 北水又用番當年大媽牛市的手法來操控港股上落,

近來爆升的股份都數係大媽掃貨, 目的係推高大市來出貨, 大鱷大媽雙劍合璧, 無論炒個股抑或指數的淡友都節節敗退, 正正係去年港股的翻轉版, 換句話說, 港股幾時爆上幾時插水都係由兩位大大話事, 當佢地沽貨食胡就係港股見頂之時, 當人人向上望就要小心, 上証表現就係港股指南針, QQ就係溫度計, 熱錢炒起港股, 但要留意游資來也匆匆去也匆匆, 賺夠就會鬆人

強股沽壓增加要回氣, 投資者沽貨食胡後換馬繼續炒上, 誓要挑戰250天線向28500進發, 5G慨念股仍受追捧, 落後股就升到彭彭聲, 接力推高大市, 港股資金市味道愈來愈濃, 板塊輪流炒到飛起, 連垃圾股都見買盤, 港股能走多遠就要看上証.大媽以及匯市表現, 美元人仔強弱係港股溫度計

~~~~~~~~~~~~~~~~~~~~~~~~~~~~

28500關鍵阻力位

恒指升至5個半月高位見28219仍未有見頂跡象, 不過如果升埋明日去到250天線就要留神, 因為今次港股升浪係跟住上証飛天, 而去年農曆新年復市, 上証升3日就回吐, 升埋明日(周三)上証就剛好升左3天, 即係後日(周四)上証會回吐, 必定會拖低港股, 加上港股超買亦要作出技術性調整, 港股亦好少全周日日升, 短炒造好我會趁反彈上250天線先收割

上証能否上破阻力2700大位非常關鍵, 如老外係呢個水平仍然繼續大手掃貨, 推動上証衝破2700, 就可推港股上28500/11200阻力大位, 本來看好後市持有重倉的燈神正在減磅, 代表技術上回調壓力大增, QQ於$350樓上沽壓加劇, 上升動力已轉弱, 大鱷可能想落去殺QQ好友, 加上牛牛大幅上移至28000附近, 亦會拉住港股後腿

睇盤路大鱷似係刻意拖慢港股上升步伐, 俾時間牛熊入局, 可能因為28800附近的熊唔夠肥, 欠缺吸引力, 現時肥熊排到上28500(死硬), 但28600~29100熊正在成長中, 再上就只得瘦熊, 當肥熊死得七七八八, 牛牛大幅上移, 就係港股掉頭之時, 早前預測港股2月走勢時, 估計2月唔會好似1月咁順灘, 一路殺上去屠熊, 會係大幅波動, 急升急跌又急彈, 貼價牛熊都要死

~~~~~~~~~~~~~~~~~~~~~~~~~~~~

28000~28500 好淡角力區

由於大鱷仍想屠熊, 所以要畫靚幅走勢圖來引股民入局, 近日大鱷都係開市先壓低再推升來畫陽燭, 震完倉又升過, 強股回氣消化沽壓後又再爆上, 落後股大受追捧, 令股民有大市跌唔落的錯覺, 市場憧憬中美談判有好消息, 美元高位回落, 跌穿97, 近日走弱的人民幣跌勢隨即喘定, 利好中港股市, 港股今日又係一插即彈, 屠熊大鱷繼續托市, 即市完成調整部署上攻, 向250天線進發, 向上阻力大位28500/11200

假設恒指2月份波動範圍:

27300(假設大鱷底線) + 1300~2000點月波幅 = 28600~29300

27500(假設大鱷底線) + 1300~2000點月波幅 = 28800~29500

如果信風水玄學家長毛蘇的預測, 今個月就不會上29000

短線上望28500係第一站, 而28800係下一個關鍵大位, 大鱷通常會等熊熊養到約4000張才會出手, 否則食完28500肥熊就要掉頭向下再試底, 27800及27500不容有失

要留意牛牛增加及上移亦會拉住港股後腿, 小心大市或會秒殺肥熊即回, 掉頭落去殺牛, 好淡通殺

28200~28500(當中有250天線及20月線)係關鍵大位, 沽壓增, 買盤縮, 小心大鱷會玩秒殺肥熊即回, 28500/11200阻力非輕, 縱使突破亦會有一番爭持, 想企穩殊不容易

今次港股升浪係受資金推動, 純炒憧憬, 冇基本因素支持, 但醜婦終需見家翁, 2月中港股業績期揭開序幕, 就要小心炒過龍的股份見光死, 而大鱷就利用輪動方式托住指數, 即係個別股份表現會比大市差, 但指數仍高企, 炒股不炒市

港股升抵28200獲利沽壓明顯增加, 因為唔少投資者.基金經理及財演都表示會係呢個水平食胡減磅, 大市沽壓會加劇, 買上資金縮, 港股近日高企只係大鱷力托指數來屠熊殺淡, 以及養牛, 以閒閒地1500點月波幅計, 後市一係上28500, 一係插穿27500, 一係兩邊都爆來擴大月波幅

2月份恒指期貨大戶加權平均開倉水平在27450, 係好淡分界線, 如跌穿, 代表好友已撤退, 只要守得住, 就代表好友仍未放手, 2月下旬仍有望創即月新高

港股近日升勢跟足上証, 由於兩地股市通常係同步見底頂, 所以港股何時掉頭就要睇住上証以及內銀內險A股

${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$