企業熱話
企業熱話
企業熱話

BU仔有福 樓神趙國雄親授秘技

2019/02/14 04:12:56 網誌分類: 生活
14 Feb
          平日見長江實業集團有限公司執行董事趙國雄博士,賣親樓都活潑生動,查實佢一向對市場營運好有心得,過年前佢就去咗香港浸會大學工商管理學院市場學系擔任特邀教授,傳授策略營銷Strategic Marketing,講咗好多管理企業營銷嘅秘技。

          上堂嗰日趙博士分析企業中唔同品牌點樣透過互相合作,達到協同效應,從而增加企業市場佔有,佢話透過分析唔同品牌嘅定位,可以好好分配公司嘅資金。小弟見到有好多同學即場發問請教趙博士呢!

          上呢堂「投資管理及資源分配」時,趙博士唔單止分享心得,仲請咗GOGOVAN創辦人林凱源,嚟講吓自己創業歷程同公司嘅市場企劃,兼且分享點樣透過公司嘅市場企劃帶正能量同幽默畀香港人!

          聽到咁多市場策略,小弟都覺獲益良多!浸大朋友同小弟講,之前浸大市場學系嘅客席教授,仲邀請過嘉士伯啤酒廠香港有限公司前大中華總裁王克勤、德國寶執行董事陳嘉賢、豐盛社企學會會長紀治興博士、社會企業商務中心首席顧問凌浩雲、全城街馬聯合創辦人兼行政總裁梁百行,咁多猛人參與浸大市場學學士同埋碩士課程嘅教學工作,你話BU仔係咪有福呢!

        Jacky哥
  
  
回應 (0)
我要發表
user