人龍糖水店宣傳語想講乜？ 「健康到裂」糖水搞笑又有創意
2019/02/18 05:12:18 網誌分類: 生活
呢間鴻輝記甜品店，糖水出晒名，Kelly未行到去遠望門口，已經見到好多人攞籌等位，等咗十五分鐘，終於入內坐低，食佢哋嘅招牌芝麻湯圓，皮厚度適中，芝麻餡好味，名副其實「皮靚餡靚」，仲有腐竹糖水唔係煲到乳化，仲食到一片片滑腐竹，果然名不虛傳。
除咗傳統嘅糖水，好似咋喳咁，店方仲有自己首創嘅糖水，牆上就貼上一款「藜麥紫米露」嘅介紹，形容為「健康到裂」，小妹睇完唔明點解，潮語「型到震」、「叻到爆」就聽得多，形容健康「到裂」就真係第一次聽。
小妹孤陋寡聞，於是請教見多識廣嘅陶傑，但佢都話從未聽過咁嘅形容詞，但佢好開放，話「可以有創意、冇問題。」咁話。
Kelly諗完又諗，莫非「健康到裂」係指食咗好味嘅糖水，身體健康，新陳代謝快咗，細胞分裂得好，咁咪「健康到裂」囉！
Kelly Chu
■糖水店外有好多食客排隊。
■糖水舖內大大隻字寫住「健康到裂」，到底係咪意思呢？
回應 (0)
我要發表