28/2~1/3 29000穿梭

港股低開低收呈陰燭, 連跌三天, 反彈在望

28/2 周四恒指收報28633, 跌124點(最多下跌186點, 一度上升160點)

國指收報11367, 跌89點(最多下跌114點, 一度上升38點), 國指跑輸恒指

回調整固.消化沽壓.貼價牛熊皆重倉.一二月連升.三月好淡通殺

大鱷部署3月大開殺戒.港股等爆邊
明日(1/3)關鍵位 28571 vs 28816
下周(4~8/3)關鍵位 28500 vs 29000

月尾恒指例牌3升3跌, 跌埋今日就剛剛好, 但淡友見3連跌也不要太興奮, 小跌無礙港股升勢, 好友仍主導大市, 今次升浪仍未見頂, 29000附近有肥熊, 食埋才跌都得, 港股連升兩個月, 已打破了熊市的規律, 上企所有平均線, 有上証牛市及阿爺不斷推住利好政策做後盾, 點都要再上29000, 下一個阻力大位在29300, 如無法突破, 就要小心

市強通常由高位跌四五百點就會反彈, 有望再上29000, 如市弱就會跌500~800點, 如轉勢向下就會跌超過千點, 未見頂前多數係急跌急彈, 要見頂後才會大插, 資金市買盤強, 一回就有買盤承接, 如長時間在低位徘徊就係見頂訊號, 有A股的H股較受惠, 因為A股牛市會推動相關股份向上, 不過要留意當A股回, 港股亦會跟, 3月係獲利月份, 不宜單邊向上望, 3月水星逆行代表股市會大幅波動(以往試過大升創新高亦見過大插創新低, 但總的來說水逆利淡居多),

港股收升月的升跌模式多數係月初創高點, 回吐尋底, 月尾再創/挑戰高點, 如收跌月就係在該月上旬創高點然後反覆向下, 在下旬創低位, 換句話說, 無論3月收升抑或收跌, 3月初都會創新高, 要好好掌握

今年展開升浪以來最多兩連跌必彈, 但今次卻是連跌3日, 今次打破慣性走勢皆因今日係MSCI調動的大日子, 可以說是技術性收跌, 任務完成明日理應彈番上去, 當貼價牛熊入局, 大鱷就會好淡通殺, 牛熊都要死

大鱷大媽低位吸了這麼多貨未走得晒, 亦會玩跌下彈下來派貨, 自從20/2收市上企28500就一直咬住唔放, 大鱷大媽正在出貨, 今次升浪已經試過好多次大陰燭見短頂回吐後急彈收復失地再破頂, 畢竟係資金市, 股市有水則生, 今次只係短線調整, 但大方向升浪未完, 按照今次升浪最多抖4日就會創新高的慣性走勢, 下周初就會突破29000破頂, 昨日(27/2)見短頂29014, 以閒閒地700點周波幅計, 如果大鱷唔想插穿28500, 下周就要上29200~29500才夠周波幅

港股睇阿爺上落, 明日上証表現舉足輕重, 近日上証未能突破3000大關皆因周一大升157點已透支了短線的升幅, 升勢過急, 要時間消化沽壓, 回氣後就會再上, 上証已步入牛一, 阿爺好, 港股就算拉車邊都會受惠, 因為A股會拉住H股上山, 不過要留意內銀內險A股表現, 係港股的溫度計

近日國指11400似有人護盤, 大鱷未食飽肥熊就一直力守, 而恒指兩度衝上去29000打回頭下試28800的支持力, 守得住試完底就會再沖頂, 待沖頂打回頭又會再尋底, 如失10天線沽壓就會加劇，因為以目前10天線的上移速度來看, 3月想守住10天線殊不容易，除非一路大市推上去, 才能避免跌穿10天線, 但目前技術指標反映動力不繼

試想想, 今日有這麼多重磅股大跌, 但指數跌幅卻不大, 而且恒指恐慌指數急挫4.54%, 唔驚啵! 友邦破頂撐市, 在在反映港股有大鱷睇場(可能係大鱷未食夠熊熊所以暫時唔俾插), 港股三連跌不是壞事, 因為無論超買以及牛熊分布嚴重失衡情況都得以紓緩, 想再升必需要先跌, 已經跌左3日喇! 按照慣性走勢明日應會作出反彈, 不過收市位會低過28816

周線較日線可靠, 因為即市升跌可能係大鱷做假嚇鬼, 無論該周如何飛天遁地, 周五就會作出修正, 好淡大鱷誰勝誰負就會揭盅, 28816就係上周五的收市位, 按照慣性走勢, 如該周收跌就會係先高後低, 以本周來看, 正正係先高後低收跌格, 星期三見周頂29014, 星期四見周底28571, 既然係先高後低, 就代表本周恒指會收跌, 那麼明日收市位就不應高過上周五的收市位28816

~~~~~~~~~~~~~~~~~~~~~~~~~~~~~~~~~~~~

升抵阻力大位觸發技術性調整

周一(25/2)超大成交沖頂冇好下場, 港股果然3連跌, 如果近日QQ及建行只係受MSCI技術性沽盤所拖累, 而不是看淡的沽盤, 今日調動已完成, 往後沽壓理應會減輕, 甚至作出反彈, 如果是的話，明日好友就可借勢反擊, 不過要留意明日大媽會否繼續走QQ及內銀, 港股通(滬)已是連續4天錄得資金凈流出, 沽壓大得不尋常, 大媽真係有可能係沽H換A

技術派認為恒指反彈熊市跌幅一半到29000就玩完, 所以近來獲利沽盤明顯增加, 技術派紛紛食胡, 而去年的蟹貨亦鬆磅走貨, 港股連日下跌養牛熊, 29000樓上熊已養到肥肥白白, 具吸引力, 而大市跌唔落亦吸引肥牛上移, 不過目前熊係肥過28500樓下的貼價牛, 要等牛牛養肥及上移才會大插, 大鱷如果想好淡通殺及擴大3月波幅, 有可能係沖高秒殺肥熊即回, 又或者係一插屠牛即彈, 牛熊都要死

而家港股已經跌左3日, 如果單邊下跌就會嚇到股民唔敢入市, 大鱷點派貨呀? 大鱷已經餓左3日冇食牛熊, 牛熊亦愈來愈貼價, 按照大鱷的習性, 兩日內(明天或下周一)必定會開餐, 一係跌穿今日低位28571, 一係上29000創新高, 不過雙底頸線27260, 中線量度升幅目標29624, 所以29000~29500獲利沽壓會大增

港股出現好消息出貨拖低大市, 不過見連跌也不要太悲觀, 以好友的能力, 一兩棍就可收復失地, 港股三連跌主因係今日MSCI調動, 要沽QQ建行內銀內險等多隻權重股, 只係係技術性沽盤, 反正結算完, 大市亦升抵29000, 係全世界短炒的止賺位, 大鱷亦唔想硬食沽盤, 加上2月下旬升勢過急呈超買, 所以回調壓力大增

~~~~~~~~~~~~~~~~~~~~~~~~~~~~~~~~~~~~~~~~~~~

A股受惠熱錢流入中國

老外繼續掃A股, 但大鱷大媽似乎係沽H買A, 北水持續沽出港股, 2月份淨賣出金額高達$88億，今年首兩個月累計淨流出$121億, 大媽趁港股反彈減持港股

港股能走多遠就要睇上証, 上証3000大關的阻力等同港股29000, 同樣係超級大位, 只要上証爆上3000阻力位創新高, 好友就有藉口殺上去29000屠熊及擴大月波幅, 因為上証.港股通常係同步見底頂, 如果大鱷唔想港股深潛, 就會以時間來代替深度調整, 即係窄幅波動消化沽壓, 即市完成調整或小幅收跌, 如收市大跌超過200點就係見頂訊號

港股年波幅仍未達標, 估計大市29014只係見短頂, 今年大頂仍未出現, 睇下老外密密掃A股, 反映MSCI加大A股權重吸引資金流入中國股市, 而特朗普要中國承諾不讓人民幣眨值來應對加關稅，就刺激人民幣走強，老外買A股除了股價上升有賺仲可以賺埋匯率升值，係雙贏，這就可解釋為何熱錢湧入內地，上証已由熊市轉牛市

有數據顯示二月外資凈流入區內股市高達45.9億美元, 主力追捧南韓.馬來西亞及中國股市, 怪不得港股成交大增, 港股資金牛未死, 仍有上升空間

今個月上到29000邊就回頭, 皆因大鱷想等29000~29500有超肥熊才殺上去, 由於今個月恒指已大升691點(一月爆升2097點), 由年度低位24896亦彈左逾四千點, 升勢過急, 所以大鱷唔想今個月升得太多, 亦想預留多些水位俾3月, 所以係28500~29000先行消化沽壓, 部署3月再創新高

根據慣性走勢, 通常突破整數關口創新高都會回一回, 抖夠就會破頂而上, 一般來說, 大頂是不會在整數關口邊幾十點，所以29014不會是頂, 當年大媽牛市真係好癲，係升到你唔信，但今次有少許不同, 今次大媽係沽H買A, 會削弱港股的上升動力

~~~~~~~~~~~~~~~~~~~~~~~~~~~~~~~~~~~~

水星逆行大波月好淡通殺

1月恒指16升6跌，升市日數大幅多過跌市, 代表好友主導，大獲全勝，而2月恒指9升8跌，則代獲利沽壓增加，好淡爭持激烈, 按此趨勢, 3月會係好淡通殺

去年初由牛市大頂33484跌至年尾低位24540, 反彈跌浪的0.5倍目標見29012, 而熊市第一個浪底在29129, 今次反彈浪觸及果然引發調整, 但回調幅度不大, 皆因有A股牛市做後盾, 淡友就等上証或權重A股反艇才有理據殺跌

雖然利好港股的消息接踵以來, 但亦要擔心的是港股1~2月已累積龐大升幅, 未真正試過似樣調整, 15/2亦只係試過一次大插531點, 港股沽壓仍未消, 只係大鱷托住指數來派貨, 而3月係高危月, 港股接連出現黃金交叉本來利好, 但亦同樣代表大市已累積龐大升幅, 反而會觸發獲利沽壓, 港股升到現水平於高位, 或會惹來配股潮, 燈神經仔通梁蛇重倉買上, 散戶紛紛入市高追, 都係利淡訊號

3月份港股會繼續受貿易戰消息左右, 亦有英國脫歐, 華為孟晚舟引渡往美國, 2月中至3月係港股企業業績期, QQ(21/3)公布業績, 成份股除息後通常沽壓會增加, 期指亦會呈低水, 全世界都話上証牛市吸引資金, 大媽似係沽H換A, 3月基金埋季結, 去年輸到嘔, 今年賺到開巷或會收割來鎖定利潤, 短炒熱錢一月大手掃港股, 熱錢通常炒兩三個月就收割, 19~20/3 聯儲局議息, 今次會否加息極難預測，金融市場勢必大幅波動，2019年第一次水星逆行就在5~28/3, 絕不會是巧合, 估計港股於2月尾及3月獲利沽壓會大增

~~~~~~~~~~~~~~~~~~~~~~~~~~~~~~~~~~~~~~~~~~~

外資積極掃A股部署MSCI增比重

今個月恒指波幅反常地窄(27534~29014), 只得1480點, 除了因為今個月只得16.5個交易日外, 亦係因為港股現正處於去年第三季的波動區26219~29083之內, 蟹貨多到不得了, 亦要時間消化沽壓

1月恒指超大波幅3114點, 早已說2月會係細波幅, 結果只得1480點, 按此推算, 3月波幅應該大過2月的1480點, 如果3月波幅有1500~2000點, 就代表3月會上29500, 或者見28000, 多位技術分析高手都推算今次升浪會見30000, 只要守得住28500, 就有望挑戰30000，如受制於29500, 就要下試28000

今次反彈浪恒指量度升幅要上29600水平, 大鱷唔想一步到位, 因為要預留上升空間營造頂部持續上移的向上趨勢, 畫靚幅走勢圖就可吸引長短期資金入市，大鱷就可以派貨啦! 所以今個月大鱷才會忍忍手暫時唔上29100,

自從農曆長假期復市後, 滬深股市成交明顯增加, 一路推動上証爆上, 踏入2019年, 老外經滬深股通積極掃A股, 今年滬深股通淨買入A股金額高達千億, 是去年全年的三分之一, 上証已步入牛市, 周一上証飛左出外太空, 提振了股民入市信心, 內地散戶爭相開股票戶口入市熱炒,  斷估阿爺不會今個星期初起步就潑冷水吧! 陰公，內地股股民近年輸到嘔，今次點都會俾些甜頭佢哋吧! 今次唔少分析都睇上証會上企3000大關, 不達目標不罷休

美元咬住96唔肯深潛, 作勢上衝, 港元拆息持續疲弱, 導致港元兌美元息差不斷擴闊, 3個月期拆息近期維持在1厘以上, 港匯弱勢持續, 或會影響港股表現

港股高開高收呈陽燭, 重上28800/11500

1/3 周五恒指收報28812, 升179點(最多上升227點)

貼價牛熊肥到不得了, 部署下周好淡通殺, 牛熊都要死, 大鱷話一係殺左佢, 一係震到佢地止蝕

要留意的是大鱷目標不單是殺指數好友淡友, 睇下唔少股份都急跌急彈, 個股好淡倉及牛熊都係大鱷的殺戮對象

港股高開高收呈陽燭, 惟沖高秒殺肥熊即回, 收窄升幅

4/3 周一恒指收報28959, 升147點(最多上升429點, 一度下跌52點)

國指收報11575, 升68點(最多上升256點, 一度下跌8點), 國指跑贏恒指

大成交沖頂冇好下場, 大鱷追殺貼價牛熊, 熊死牛命危, 大媽狂掃QQ托沽