陸羽仁周記
陸羽仁周記
陸羽仁周記

入摩加重三大穩膽

2019/03/04 04:12:52 網誌分類: 經濟
04 Mar
         上周恒指衝擊29000點未果,不過,上周五因MSCI明晟指數公司宣佈調高A股權重,內地股市再度大升,上證指數有挑戰3000點關口之勢,港股走勢再度向好,特別係國指升勢再度跑贏恒指。恒指3月份開局不俗,收報28812點,升178點,中止三連跌,全周累跌4點。

          中港股市向好,美股氣氛亦有改善,杜指上周五反覆向上,最多升過227點,升至26143點,收報26026點,升110點;標普500指數收報2803點,升19點;納指則升62點,報7595點。全周計標普500指數累升0.4%,納指升0.9%,是連續第10周上升,創1999年以來最長升市。杜指連升九周後輕微回吐,全周微跌0.02%。

        效力比首度入摩強

          美國無論係北韓抑或對華政策都陷入膠着,市場改為注視A股表現。內地最近大唱牛市重臨,鬼佬呢個時候都加入贈興,宣佈加強A股在全球股市權重。內地在2014年開始爭取入摩,經過三年失敗後,終於在2017年獲宣佈納入摩根士丹利全球指數,並在翌年生效。雖然納入大摩國際指數落實,但無法為A股帶來預期中的提振作用,A股在入摩後反覆下跌,所以最近雖然開始有增加A股權重說法,但市場都唔太關注。不過,內地分析家又對入摩加料希望重燃,認為今次提高權重吸引嘅資金,會比上次威力更大。

          根據MSCI公告,納入因子嘅提升將分三步落實。首先是2019年5月,MSCI將中國大盤A股的納入因子,由5%提升至10%,同時將創業板大盤A股以10%的納入因子,納入到MSCI指數體系中。然後第二步在2019年8月,MSCI會把指數中的所有中國大盤A股納入因子,從10%增加至15%。最後是在2019年11月,MSCI將把中國大盤A股的納入因子,由15%提升至20%,同時將中國中盤A股(包括符合條件的創業板股票),以20%的納入因子納入MSCI指數體系。

          完成三步實施後,MSCI新興市場指數的預計成份股中,有253隻中國大盤A股和168隻中國中盤A股(其中包括27隻創業板股票);將進一步增加A股佔MSCI新興市場指數權重至3.3%。未來會將繼續觀察市場發展,以確保中國A股在MSCI指數中的權重及時反映市場准入狀況改善。

        現水平風險未算高

          喺解釋今次加重決定時,MSCI董事總經理兼MSCI指數政策委員會主席Remy Briand明言,A股能獲加重比例,同互聯互通有關係,透過呢個機制,中國市場嘅准入條件持續得到改善。例如,互聯互通機制每日限額擴大四倍、股票停牌情況顯著減少、上海證券交易所收盤競價機制的成功實施等。

          據MSCI預測,每一次以2.5%的因子納入,將為A股帶來約110億美元增量資金。按此推算,納入因子由目前的5%擴大到20%,預計將為A股帶來約660億美元的增量資金,即約4429億元人民幣。內地首度入摩,結果反應令人失望,市況大勢基本上大回小漲,炒作入摩如果走得稍慢,隨時泥足深陷。雖然有前車可鑒,但內地今次表現依然相當興奮,認為好事陸續有嚟。如果同2016年首次入摩比較,今次加重有兩大不同,一是內地股市水平更低,過去雖然經濟增長放緩,但經歷兩年多增長同通脹,實際股市估值當然低好多。

          其次就係外資取態,2016年外資基本看淡,大行唱空中國仍未完結。相反,去年雖然中美喺貿易方面角力,導致股市氣氛好差,但外資長線基金開始進場,如果考慮呢啲差別,現階段走去炒作加重唔算有太大風險。

          喺炒作入摩下,內險股及券商股上周五繼續發力,新華保險(1336)收漲6%,報40.3元;國壽(2628)收彈5.6%,報22.8元,跑贏一眾藍籌股;人保(1339)收升3%,報3.67元;平保(2318)收升2%,報84.25元。

        券商熱炒 內險基金宜長揸

          券商方面,中信建投證券(6066)收飆103%,報7.83元;招商證券(6099)收升6%,報11.96元;中金公司(3908)收升5%,報19.18元;廣發(1776)收升4.5%,報13.84元。另外內房股都追落後,龍光(3380)收飆7.7%,報12.04元;金茂(817)收升3.7%,報3.95元;碧桂園(2007)收漲3%,報10.66元。

          內險同券商股向好,係睇好A股前景,呢個可能係今年投資主題之一。如果睇好A股,相關指數基金、內險股加券商股係三大穩膽。當中券商股波動大,炒味濃,內險同指數基金就可以作長線啲部署。

        過檔貿發局 岳少近日精神爽

          上個星期,政府宣佈兩個公營機構執位,旅遊發展局主席林建岳,將會轉任貿易發展局主席,接替任滿嘅羅康瑞。至於旅遊發展局主席一職,就會由怡和華人大班猛人彭耀佳接任。

          岳少執掌旅發局六年,離任係意料中事,聽聞佢對呢個工作愈做愈有癮,所以都有啲依依不拾。喺交棒前,本地旅客人數再創新高,岳少應該有得交代。

          岳少本身識飲識食,又經常周遊列國,擔任旅發局主席最好不過。岳少喺三月底就會完成任期,到五月先任新職,政府提早公佈人選,係因為岳少稍後上京開兩會,就可以有明確身份現身。

          岳少除咗做旅發局主席,近年都贊助商界一帶一路活動,可能因為呢個原因,所以政府就搵佢接任貿易發展局主席。近日,岳少可以話係「人逢喜事精神爽」,麗新名下喺海洋公園嘅新酒店落成無耐,就獲政府選為大灣區宣講會嘅場地,當日全城政商界猛人雲集,而且新聞曝光唔少,令到酒店知名度即時大升。

          至於接任岳少旅發局位置嘅彭耀佳都好猛料,本身除咗係洋行大班,亦都做過總商會主席。政界傳言佢同特首林鄭月娥關係良好,以咁嘅背景,能夠做旅發局主席呢個位,真係不足為奇。

        陸羽仁
回應 (0)
我要發表
user

網誌分類