KellyChu - 第二屆深港澳青少年設計大賽啟動 星島CEO蔡晋：拉動大灣區融合發展｜Executive日記

第二屆深港澳青少年創意設計大賽(簡稱「青創大賽」)星期六喺深圳市前海大廈舉行啟動儀式，星島新聞集團行政總裁兼社長蔡晋出席儀式，表示希望透過星島嘅覆蓋網絡，可以將呢個咁好嘅活動推廣出去，拉動整個大灣區融合發展。

「青創大賽」係由深圳創新創意設計發展辦公室、深圳市文化創意與設計聯合會、深圳青年聯合會、香港星島新聞集團、澳門文化推廣協會、澳門中華民族文創學會共同主辦，旨在推動三地青少年交流創新，共同塑造和豐富灣區人文精神內涵。

深港澳三地19歲以下嘅青少年都係活動對象，參賽年齡下限今年放寬至小學一年級。參賽作品範疇則分為科技新發明、創意新媒體、設計新視野及科幻新世界。

蔡晋形容，青少年係未來，創科亦都係未來，所以非常希望推動青少年及科技產業嘅融合發展，利用星島喺教育界同科技界既有資源，以及線上線下嘅媒體覆蓋網絡，相信可以令更多學生參與活動，將活動辦得有聲有色。佢表示，中國嘅科技、中國嘅未來都係前景無限，鼓勵青少年融入到大灣區，發揮才能。

深港澳三地主辦方代表以及來自三地的設計師、學生代表等，近200人參加咗啟動儀式，標誌住呢個橫跨深圳、香港、澳門嘅青少年創意設計盛事又一次正式拉開帷幕。

Kelly Chu