逾二千人參加 着古裝大陣仗 道教日盛大巡遊 為香港祈福
2019/03/18 04:12:58 網誌分類: 生活
Kelly搭車喺旺角經過，見到好多人着住七彩嘅古裝服飾，當中仲有啲人着住道袍，手持頭牌，甚至香爐，有人就手持塵拂，係道教嘅標誌聖物來㗎喎。
仔細一問，原來昨日係「香港道教日」，由港府訂定嘅，二○一三年起每年三月嘅第二個禮拜日就係「道教日」。
呢個巡遊全名叫「己亥年（2019）香港道教日祈福大巡遊」，顧名思義目的係為了祈福，同時亦弘揚提倡正統道教嘅意思，因為一眾道教人士發覺，社會大眾對道教存在唔少誤解，除咗呢個巡遊之外，佢哋都舉辦好多嘅講座等，仲希望太上道祖寶誕日，能成為本港法定假日。
呢個巡遊警方就話估計有二千二百人參加，佢哋喺下午一時出發，從晏架街遊樂場出發，途徑彌敦道、廣東道等，最後去到尖沙咀文化中心露天廣場。好多著名道觀例如蓬萊仙館都有參加，佢哋嘅儀仗隊唔單止有法師，仲有鳴鑼等，十分之熱鬧。
Kelly Chu
■噚日係「香港道教日」，道教團體搞咗個巡遊為香港祈福。
■巡遊隊伍中唔少人着古服。
■有信眾抬住祖師像參與巡遊。
回應 (0)
我要發表