創獨立廚廁 有公屋之父美譽 廖本懷最愛華富邨重建前故地重遊
2019/04/08 04:12:31 網誌分類: 生活
華富邨唔單止係香港首個以市鎮形式出現嘅屋邨，邨內有獨立嘅商場，成為本港創舉，更係大部份由房委會喺七十至八十年代規劃同落成嘅公屋樣板，例如麗瑤邨、長青邨、禾輋邨等，都係參照華富邨模式興建。
華富邨採用雙塔式設計，喺近海邊嘅大廈主要是較矮嘅大廈，咁嘅佈局令更多住戶擁有海景，所以有「平民豪宅」之稱，呢個設計就係出自首任華人政務司廖本懷之手。佢唔單止設計咗當時嘅公屋藍本，仲創立咗居屋、綠白表申請機制等，沿用至今，所以佢又有「公屋居屋之父」嘅稱號 ，係香港房屋史上舉足輕重嘅人物之一。
一四年政府宣佈重建華富邨，期望可以增加單位供應，消息一出引來唔少人嘅不捨。昨日現年九十歲嘅廖本懷親臨華富邨緬懷，喺活動入面播咗佢以往嘅一個採訪短片，憶述有次巡視，一名居民同佢講好鍾意華富邨，因為有獨立廚廁，仔女嘅哮喘都變好咗，令佢相當有滿足感。
廖本懷同一班舊同事係邨內行翻轉，話自己最鍾意就係華富邨，每次坐飛機經過，都會一直凝望華富直至睇唔到為止；最後都祝願居民開心健康，話自己「無咁好彩」，未曾有機會喺華富邨居住。
KellyChu
■廖本懷在華富邨重建前再故地重遊。
■華富邨係香港首個以市鎮形式興建嘅公屋。
回應 (0)
我要發表