網民打「溫情牌」　求鄭秀文演唱會票

2019/04/11 04:12:14 網誌分類: 生活

11 Apr

        　　樂壇天后鄭秀文開騷，門票炒到比天高。但有網民一同打「溫情牌」和「好人牌」公開求票，Kelly都想知會唔會有人完成佢嘅心願。

        　　將喺七月紅館上演嘅鄭秀文演唱會，Kelly上網睇一睇，先知門票炒到九萬七千蚊一張，竟然都有人要，認真瘋狂。昨天一名網民求票，成為熱議，佢唔係出得起錢，而係打「溫情牌」，話自己唔係鄭秀文迷，但媽媽同佢講好想聽Sammi唱歌。佢仲話，之前買咗八張黃子華嘅飛，自己要咗兩張，其餘六張全數用原價放咗比人，希望今次有人可以同佢上次一樣，等佢以原價買到兩張Sammi飛，等佢同媽媽一齊去睇。

        　　Kelly 見到有網民留言，稱同樓主買咗兩張黃子華嘅飛，Kelly唔敢講係真定假，不過係希望樓主過兩日出帖話畀大家聽佢買唔買到飛啦。

        Kelly Chu