11~12/4 窄幅屠牛熊.好淡通殺

2019/04/11 21:18:26 網誌分類: 經濟

11 Apr

好淡通殺

11/4周四收市~港股失守30000大關, 收29839, 跌280點

一直話30000大關雖然突破但站穩不易, 因為近來老外頻頻沽出A股拖低上証禍及港股, 而且30000樓上係蟹貨重倉區, 牛肥熊瘦 (14275牛 vs 7720熊)拉住港股後腿亦削弱港股上升動力, 道指高見26487/上証高見3288齊齊打回頭, 中港美三地通常係同步見底頂, 港股回吐壓力增加, 如中美股市回落, 亦會拖低港股, 上証阻力3300/道指26500/恒指30300.30500

大鱷大媽興風作浪將港股舞高弄低, 拋到失暈, 無論係過夜抑或即市都不斷轉向, 因為大鱷唔想俾股民搭順風車, 唔想益左股民順勢跟入獲利, 亦想殺及震走牛熊, 所以無論做好抑或做淡, 過夜過周末都可以變天, 急升翌日可急跌, 急跌翌日可急彈, 短炒買中方向食胡都要手腳快, 好似昨日港股V彈, 人人看好, 今日就插水, 又例如周一二創新高, 但有誰會想得到周二三會變臉, 所以今日大插亦不要凈係向下望, 亦要留意明日插多一棍後隨時會反彈, 因為大鱷通常落山食1~2口牛就拗腰彈, 而每周恒指多數跌1~2天, 如今已跌了2天, 不要忘記周一係升市居多, 本周回吐, 只要熊仔養肥, 大鱷食完牛扒又會踢番大市上去食熊掌

每日開市首半小時市況最混亂, 因為要短時間內反映中美股市表現, 係散戶最易企錯邊的時段, 留意地產板塊升跌及內銀表現會有啟示, 地產分類強就代表大鱷撐市唔俾深潛, 要地產分類大跌港股才會插, 內銀內險強弱同國指走勢密不可分, 整數關口有指標性, 上証失守3200, 恒指就梗係30000不保啦!

元帥測市強項~慣性走勢, 收跌周多數在周四五創周內低位, 即係今日低位29783不會是底, 明日會繼續隊落去食牛扒順道擴大周波幅, 會否又玩V彈就要睇上証, 恒指已連跌兩天, 今年恒指試過4次兩連跌都有得彈, 只係試過1次三連跌, 皆因大鱷唔想走單邊俾股民捉到路, 所以玩失驚無神轉向或一插即彈來好淡通殺, 按照慣性走勢明日反彈機會大, 由於30600樓上熊一直養唔肥, 大鱷營造見頂形態就可吸引多些熊熊淡友入局, 待完成調整又可以上番去開大餐

近來恒指最細周波幅有630~690點, 而今年只係試過一次只得474點細波幅, 換句話說, 現時周波幅只得438點仍未達標, 明日理應插穿今日低位29783來擴大周波幅, QQ今日收$391.4, 今早大裂口高開屠熊殺好倉, 遺留上升裂口$389.4~$391未回補, 呢D裂口多數會補, QQ係港股溫度計, 睇下明日落去補完裂口能否彈番上去守住$390就知大鱷心意, 能否突破並上企$400阻力大位係港股後市升跌指標

今日收市重上29800關鍵位目的係養牛引好友, 因為貼價牛由本周二起日日係產房出世, 大鱷想引多些牛牛入局才隊穿29700, 通常周五都係大龍鳳的日子, 由於上証本周收跌居多, 中港股市同步的話, 明日恒指收市位就會在29936之下, 明日係畫圖日, 好友亦要出手畫周線, 所以不能深潛, 港股後市就要看中美股市, 因為三地股市通常係同步見底頂, 大鱷通常等上証見底就會借勢反擊

~~~~~~~~~~~~~~~~~~~~~~~~~~~~~~~~~~

明日係畫圖日多數會有大龍鳳, 而大鱷由山頂30222途長路遠走左幾百里路落山不可能空手而回, 所以明日大鱷必定會隊穿今日低位29783來秒殺BB牛, 不過以往港股大插後淡友就會回補空倉或食胡, 推番大市上去

內銀係拖低國指的元兇, 建行的貼價牛肥到不得了, 大鱷流晒口水, 屋漏更兼逢連夜雨, 有利淡內銀消息, 銀保監鼓勵內銀將逾期60日以上貸款納入不良貸款, 大行擔心個別內銀或面臨撥備不足, 國指近日走弱, 內銀捱沽可能係大鱷大媽早已收到風所以散水, 燈神梁蛇過去幾日高追, 今早開市後掃貨，好友多得佢唔少, 相反指標再次靈驗, 燈神周初見港股創新高就信到足, 話淡友無能力反擊, 哈))) 淡友就叻俾佢睇

根據標題網誌的底頂表, 每次大市見頂就會由高位嘔約660~1040點, 即係下一站29560, 29800係關鍵位, 港股會否落地獄就要睇上証, 大鱷亦有可能守住大位, 玩跌下彈下來派貨及養牛熊, 要大市深潛必需要有肥牛, 大鱷不愛瘦牛, 未養肥大鱷就會托住大市, 仲有一個數跌幅的方法, 以往市強嘔四五百就彈, 市弱嘔800~1000點, 即係下一站係30222-400~500=29700~29800(本周回吐目標)

大鱷隊港股落山主要係為了屠牛殺好友, 牛熊分布就係大鱷的導航器, 半肥瘦牛在29600~29800, 肥牛在29500~29600, 但29200~29500只得瘦牛, 唔夠肥, 欠缺吸引力, 超級大位要有超級肥牛陪葬, 如果大鱷嫌牛瘦就不會隊落去, 通常食一兩口牛就拗腰彈高, 短炒可要睇位炒波幅

過去幾日我已提醒大家港股發出多個向淡警號, 例如中港美三地股市係通常係同步見頂, 港股多數係彈2~3個星期就插水, 周二起貼價BB牛出世, 大市超買, 簡單來說, 就係本周初港股創新高, 但唔少監察股例如港交所.友邦.新地.內銀.內險卻紛紛沖高回落或逆市下跌, 而不是好似月初一窩蜂爆升, 當時我就話大鱷大媽臨危托沽, 趁反彈走貨, 港股唔會飛出外太空, 昨日大鱷托市玩V彈扮跌唔落震熊養牛引好友, 今日果然大插, 不過大媽趁大跌又入貨喇! 上証今年試過好多次兩連跌都彈, 跌埋明日上証就連跌兩天, 所以我會趁明日港股落山分注補回早前沽出的股份,

${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$ ${#icono_64}$

試完底再沖頂.牛死熊命危, 部署爆頂屠熊

12/4周五收市~港股V彈, 10天線失而復得, 恒指收29909, 升70點

跌下彈下溫水煮蛙式派貨

今日大鱷果然食牛扒, 445隻牛陣亡, 市強通常吃1~2口牛就會反彈, 港股跟足慣性走勢結束兩連跌，並以收市U盤最高位收，先跌後揚升，單日轉向，成交急降，係大龍鳳先兆，慣性走勢係試完底就會再沖頂, 沖頂打回頭就要再試底, 不斷拋上拋落, 股民買上買落都要輸俾趴街大鱷

恒指多次上破30000大關不過都企唔穩, 皆因自從上証站上3200老外就密密沽出A股拖低上証禍及港股, 所以恒指30000亦無法企穩, 而且30000樓上係蟹貨重倉區, 牛肥熊瘦拉住港股後腿亦削弱港股上升動力, 道指高見26487/上証高見3288齊齊打回頭, 中港美三地通常係同步見底頂, 港股回吐壓力大增, 早前威威的中移新地等股份持續捱沽, 見資金換碼內銀追落後

今次港股調整幅度略嫌不足, 加上下周復活節有長周末, 假期前後多數會有大龍鳳, 如下周沖頂打回頭要慎防再試底, 因為整體牛熊分布係牛肥熊瘦, 牛會拉住港股後腿, 14248牛 vs 7592熊, 今日只係30200附近超貼價熊加倉, 而30600樓上熊不加反減, 大鱷不會為了小熊而飛出外太空, 以今日29900水平為中軸, 上落400點都有牛熊殺, 肥牛在29500~29700, 肥熊在30200附近,

而家才是月中, 有排都未到結算, 大鱷不會一直托住高位, 加上有2天復活節假期因素(內地如常開市, 美股19/4休市1天), 禍福難料, 持倉風險高, 避險情緒會升溫, 大市獲利沽壓會增加, 入市買賣要小心

本周港股消化沽壓收跌係好事, 因為過去一個月恒指係梅花間竹, 一周跌一周升, 按照慣性走勢每逢周一多數有彈高吃, 今日收市企29800樓上, 代表大鱷仍想重上30000, 而家要擔心的是下周有復活節假期, 長假期前會有鎖定利潤避險沽壓, 可能會打破升跌慣性走勢

港股尾市異動, 買盤湧現, 收市U盤A50走高, 在在反映上証下周一會彈高, 港股收市後公布的人民幣新增貸款急增, 可能係大落後的內銀受追捧的原因,

今日港股午後突然由低位29694拗腰大幅急彈215點上全日最高位29909收, 係偷步反映今晚美股及上証下個交易日的升幅, 港股能走多遠就要看上証及大媽, 以及港股溫度計QQ表現, 因為$400係阻力大位, 蟹貨重倉區

恒指每周細波幅通常有500~700點, 大波就會近千點

舉例一:

假如下周低位在29800, 那麼加500~700點周波幅就代表會上30300~30500

舉例二:

假如下周低位在29700, 那麼加500~700點周波幅就代表會上30200~30400

舉例三:

假如下周高位在30300, 那麼500~700點周波幅就代表會落29600~29800

如此類推, 可自行預測周波幅, 萬一市況不如預期，臨場再調整預測

另一個計算波幅的方法係以今日收市水平29900為中軸, 上下400點穿梭

慣性走勢一環扣一環, 要互相配合, 計完周波幅就要考慮哪個劇本成事機會率較高, 因為港股好難獨自去偷歡, 中港美三地股市通常係同步見底頂, 時間相差不會遠

道指5/4(周五)於26487見頂, 11/4低見26143見底, 上周五(12/4)再急升, 高見26436, 非常接近前頂26487, 道指未來幾日能否向上突破係港股後市的指標，

受5/4(周五)清明假期影響，中港股市押後了一兩天才見頂

上証8/4(周一)於3288見頂, 12/4低見3168見底(收3188), 上証能否重上3200並突破前頂亦係港股能走多遠的指標

恒指9/4於30222見頂, 12/4低見29694見底(收29909), 夜期收30162, ADR收30034

~~~~~~~~~~~~~~~~~~~~~~~~~~~~~~~~~~~~

尾市異動買盤湧現.成交急降.大龍鳳先兆

大鱷玩頻頻轉向才能獲得最大利潤, 周初港股沖高回落, 兩連跌後急彈, 今日以收市U盤最高位收, 黑箱作業由跌轉升, 彈高91點, 真係神級, 即市忽上忽落, 好友淡友手腳慢都要死, 企錯邊就會左一巴右一巴,

早市國指持續走強力撐大市, 加上半日走勢係9:43見低位29696, 10:14見高位29839, 先低後高利好, VHSI恒指恐慌指數大跌, 近半日低位收, 在在顯示下午港股向好機會大,

我一直認為有炒即市的大媽大鱷將港股舞高弄低來搵食, 波幅太細冇肉食, 所以必定會想辦法擴大即市波幅

今早半日高低位29696~29839, 波幅只得143點未達標, 代表午後必定會爆邊, 結果下午先向下爆~破底, 再向上爆~破頂, 即市高低位變成29694~29909, 唔計昨日的特大波幅, 4月份恒指即市波幅200~285點, 全靠午後沖上去來擴大波幅, 今日波幅215點剛好達標(絕不會是巧合, 係大鱷做手腳), 港股升跌都好假, 夾硬來, 其實係班趴街大鱷大媽做市來搵食

明知升跌都只係大鱷大媽玩野, 就唔好以為大市會單邊向上或向下, 市強嘔四五百就會彈, 市弱就插千點, 昨日收市總結已一再提醒大家按照慣性走勢插多一棍港股隨時會反彈, 午後內地公布的出口數據勝預期, 中港股市齊齊拗腰收復失地, 過去幾日港股受拆息上升拖累走低, 今早港元拆息全線回落, 為半個月以來首次, 減低港股下行壓力,

今日道期靚仔, 愈彈愈高, 但大鱷大部份時間都特登壓住大市, 午後及收市U盤才彈高, 究竟係養牛定係引淡, 下周一揭盅, 以今日收市水平29900為中軸, 下星期上落400點就有牛熊吃

由於今日係畫圖日多數會有大龍鳳, 而大鱷由山頂30222途長路遠走左幾百里路落山不可能空手而回, 所以開市前預期大市會插穿今日低位秒殺BB牛, 然後會跟上証例牌V彈, 結果大市跟足慣性走勢, 大鱷跟足劇本玩高台跳水後彈高,

~~~~~~~~~~~~~~~~~~~~~~~~~~~~~~

陸羽仁: 股市還是在炒經濟好轉的預期。港股近期給人正在慢慢回調的感覺，但看恒指近三個月的走勢，一級級走上的趨勢明顯，即使未來回落深一些至29500點水平，仍處於一個很健康的上升軌道。見到大市繼續升，手上沒有甚麼貨，又不敢追，只能做塘邊鶴。然而，散戶持貨不多，反而成為大市的利好因素。沒有太多散戶入場接貨，大戶手上的好倉一日未清倉，一日都會留在場內繼續玩，仍然是一個散戶看淡，大戶造好的格局。

可以「揸住間尺做人」，意謂看着大市走勢，劃出上升軌，大市不跌穿上升軌下方，就繼續炒，若見到大市深度跌穿上升軌，就要小心留意大市可能已經轉勢。

..........................................................

授人以魚不如授人以漁, 元帥每日犧牲睡眠時間長篇大論寫收市評論, 就係希望大家能自行分析大市而作出正確的買賣決定, 因為元帥不可能日日寫收市評論, 如果元帥不現身就進退失據企錯邊, 元帥再寫文也是徒然

財經留言版的標題網誌已詳列港股的慣性走勢模式, 係元帥獨創的慣性走勢測市法, 只要牢記, 入市買賣就會得心應手, 不會被大鱷牽住鼻子走, 如果因為未熟讀上面的天書而錯失買賣良機，就要自我反省，好好檢討

注意事項:

內地將公布3月信貸、外貿、通脹等經濟數據

(周三)內地公布首季GDP等重要經濟數據

17/4(周三)#788中國鐵塔公布第一季度業績

美企宣布季績，又到了炒業績的時間

火星仁兄無私分享
牛熊分布一目了然
大鱷奸計無所遁形
入市買賣得心應手