全球最佳一哩馬 或會遠征日本 郭少明伯樂眼 相中「美麗傳承」
2019/04/23 04:12:12 網誌分類: 生活
現時「美麗傳承」以出賽得分計，成為全球最佳一哩馬。馬主郭少明話，買馬部份係運氣，但眼光同樣重要，正如投資地產同股票一樣，幸運係有成數嘅。據佢講，最初買「美麗傳承」，係想佢跑打吡賽事，但「美麗傳承」第一季嘅表現令佢有啲失望，後來發現佢有跑短途嘅潛質，就聽練馬師建議，畀佢轉跑短途，結果今季七捷，令佢喜出望外。
由郭少明仔仔郭浩泉養嘅「美麗傳承」，如果喺嚟緊周日喺富衛保險冠軍一哩賽奪冠，除咗會得逾一千萬獎金，仲會創下一季八捷嘅新紀錄，超越前馬王「爆冷」所得總獎金超過八千三百萬嘅紀錄，有機會成為香港歷來贏得最多獎金嘅馬王。
至於往後「美麗傳承」會唔會喺六月去日本參加「安田紀念賽」國際賽，要視乎郭少明同郭浩泉溝通，事關仔仔話打算安排佢出戰日本，佢話若果唔去，相信佢以後會後悔，因為未必會養到一匹咁勁嘅馬。父親就承認兩父子有分歧，佢唔贊成去，但個仔想去，因為好多馬迷留意「美麗傳承」係會代表香港，佢唔想馬匹會有任何損傷，所以兩父子會好小心作決定。
KellyChu
■「美麗傳承」周日力爭衞冕冠軍一哩賽，郭浩泉（左二），郭少明（右一）。
■全球最佳嘅一哩馬「美麗傳承」，周日將代表香港出戰富衛保險冠軍一哩賽。
回應 (0)
我要發表