6~8/5 立夏立即破位而下

2019/05/06 21:18:38 網誌分類: 經濟
06 May

6/5 周一收市~貿易談判生變數, 轉節氣立夏(立下), 港股破位而下

港股低開低走呈陰燭, 大鱷大媽做市.港股破位而下.蓄意謀殺肥牛

恒指收報29209, 暴跌871點(最多下跌1125點), 失守10.20.50天線

短短兩天吻別30000魔咒位屠熊再直插隊穿29000落地獄食牛扒

1/4上升裂口29100~29383 已於6/5全數回補, 為強烈利淡訊號

6/5恐慌性拋售下跌裂口29384~29678有待回補, 市弱補部份

4月份大鱷將港股點穴, 聚頂托沽派貨以及養牛熊部署大屠殺, 4月份牛熊通殺, 5月開局爆上30000殺熊, 翌日插穿29000屠牛, 大鱷正一趴街, 操控大市如入無人之境, 升跌都好假, 以大鱷操控港股的能力, 千點上落毫無難度, 好友淡友牛熊都要死, 今次一大棍插穿大位, 形勢急劇轉差, 持重倉的基金及大戶會爭相沽貨套現避險, 沽盤會形成骨排效應, 通常破位跌勢會轉急,

今年首季憧憬中美談判會達成協議, 四個月內恒指由低位24896彈到上30280, 今年累計大幅反彈5383點, 如今只係由高位嘔約1300點, 太少了吧! 年初低位25000附近入貨現水平食胡都好和味, 大市沽壓未除, 即係未見底啦! 市弱不會在星期一見底, 所以後市會插穿今日低位28956, 低處未算低, 點升上黎就點落番去, 向下級級落, 28800.28500.28223.28000..... 大鱷或會扮守得住250天線來養牛, 等養肥才插

恒指一般月波幅係1300~2000點, 不過去年打貿易戰月波幅就高達2100~3400點, 港股下跌步伐就要睇牛熊分布,大鱷通常會等養肥牛牛就會出手, 愈多人博反彈跌勢就愈急, 如果係災, 連阿爺都救唔到的話, 失守28000就會向27500進發, 雙底頸線在27260

過去4個月港股反覆向上尋頂期間, 每次上到阻力大位就窒窒步引熊入局, 跟住就爆上去屠熊殺淡, 由4月中起就玩翻轉版, 落到29500.29300.29000.....等一眾大位就窒一窒扮跌唔落, 結果如何都唔使我講啦! 如回吐一月升浪的0.382倍見28223, 恒指250天線在28000邊, 而國指250天線在11000邊, 要做好防風措施噢! 通常收跌周不會在周一見底, 多數係周四五創低位, 即係未跌夠

今日港股大插, 島形頂猶如泰山壓頂, 令本來4月份29900上下穿梭的波動區間大幅下移, 變成短線在29000穿梭, 港股破位, 向下趨勢已確認, 不過如果阿爺出手救市就會擾亂港股的下跌步伐, 而上証表現亦會令港股大幅波動, 大鱷只要操控QQ就可控制港股的升跌韻律, 要留意QQ表現,

4月中港股見頂回落, 當時寫收市總結標題係聚頂+托沽+暗湧, 當時形勢已轉淡, 過去幾周一直話要慎防大市會見29000, 因為多個測市指標都利淡, 大鱷大媽積極走貨撤退, 就算大市收升但股份唔跟指數升, 托沽味濃, 好明顯係虛火上升, 假的真不了, 30280封了頂, 大市持續出現利淡訊號, 一直提醒大家按照慣性走勢, 高台上升裂口多數會回補, 以月波幅計明明要插穿29384來回補1/4的上升裂口順道擴大月波幅, 但出乎意料的是, 大鱷為了部署4月於高位結算及養牛熊, 無論4月下旬出現任何利淡消息, 大鱷都力守29500, 結果出現罕有的超窄月波幅, 淡友紛紛敗退, 原來大鱷4月托市目的係部署5月的大龍鳳, 其實收市U盤已有啟示, 結算前多數係踢高收, 當時我就話要慎防結算後好友會縮手, 結果由結算日(29/4)起, 收市U盤就走低居多, 反映托市任務已結束, 好友已鬆人

~~~~~~~~~~~~~~~~~~~~~~~~~~~~~~~~~~~~~~

逼死淡友就插水

過去幾周港股有見頂派貨味, 但大鱷耐不耐玩挾淡, 淡友做淡做到心灰意冷只好反手做好或觀望, 大鱷成功令股民誤以為不會回補29100~29384的裂口, 大鱷奸計得逞, 吸引大量牛牛聚集在裂口區, 萬事俱備, 只係等利淡消息做大插催化劑, 5月開局大鱷伸埋最後一腳上去30081擴大月波幅, 做5月頂及食埋貼價熊, 特登托住大市拖到大媽回歸, 等5月才向下爆邊, 今年首季港股的大升浪股民賺賺埋埋就要嘔番俾大鱷, 倒頭來都係要輸, 入市小注怡情, 大注亂性

今日大鱷借突發利淡消息玩大裂口低開739點見29342, 大市跌穿關鍵大位觸發程式沽盤, 逼好友止蝕斬倉進一步推低大市落28956, 擺明係為了屠牛而插水, 由於貿易戰談判有變, 消息極淡, 大鱷唔想俾機會29000牛逃生, 所以直插1125點, 一棍大插千多點低見28956, 由於跌勢過急, 明日有望反彈上去回補部份下跌裂口, 如果市弱沽壓大就只會回補部份裂口, 死貓彈完再尋底, 因為以月波幅計仍有下跌空間, 大市未有見底跡象, 後市不容樂觀

如果5月收跌, 就不會在月初見底, 3/5(周五)高見30081, 6/5(周一)低見28956, 按照慣性走勢, 月內的底和頂不會在兩個交易日內出現, 代表後市會破底, 不過大鱷嫌目前牛牛太瘦, 所以午後抽番大市上去29200, 就好似早前大鱷一直守住29500來養牛一樣, 一直扮跌唔落, 等牛重倉才大插破底

有基金經理表示港股大裂口直插跌勢過急, 消息主導後市急跌亦可急彈, 為免左一巴右一巴, 索性以不變應萬變, 特朗普口出狂言可能是談判手段, 會觀望中美談判會否仍繼續進行, 持貨待反彈才定去留

~~~~~~~~~~~~~~~~~~~~~~~~~~~~~~~~~~~~~~

老外大媽沽貨撤退

老外大媽齊齊沽貨走鬼, 沽壓太大, 連早上人行宣布中小銀行實行降準, 放水救市都幫唔到手, 黃金周長假期後復市上証仍暴跌171點(-5.58%)收2906, 創2016年2月以來最大單日跌幅,亦創近兩個半月的新低, 道期瀉約500點, 大鱷借狂人發爛渣消息夾硬隊穿埋29000屠牛, 分明係睇住來食, 由於28950樓下只得瘦牛, 大鱷秒殺肥牛即彈上60天線, 收29209, 目的係推番大市上去引股民入市接火棒, 亦可引牛入局

今日買跌的逆向ETF買盤唔算積極, 估計係投資者認為大市會有反彈, 所以插到29000做對沖意欲不大, 相信彈上去沽盤會再度湧現, 石石認為29200會是短線支持位(太樂觀了吧!), 咦))) 上周五唱好的燈神梁蛇轉口風唱淡, 非常悲觀啵! 相反指標即係有死貓彈啦! 中港股市今日一棍大插跌勢過急亦等超跌反彈, 散戶趁死貓彈打開逃生門就要好好掌握, 向上阻力29300.29500(超級阻力位)

大鱷食飽肥牛就將港股點穴來養牛熊, 結果熊熊大幅下移至29500水平, 而好友膽生毛, 28900樓下瘦牛變肥牛博死貓彈, 牛熊都貼價, 代表港股未震完, 中港股市破位而下, 等阿爺救市(市傳國家隊準備出手), 等回補今日的下跌裂口, 等超賣反彈上去玩吻別, 等淡友回補空倉, 等博反彈買盤進場, 等企業回購撐股價, 等養肥牛牛就破底落地獄, 港股破位而下, 失守50天線, 底頂下移, 敗象已逞, 好明顯大鱷已完成向淡部署才會容許港股跌穿多個關鍵大位, 好友叻左4個月, 風水輪流轉, 今個月輪到淡友威威, 由於老外大手沽A股, 會令阿爺難於托市, 因為沽盤沒完沒了, 如果阿爺硬接沽盤等同丟錢落大海,

過去一個月美國一直放風中美談判會達成協議, 今次狂人突然宣布加關稅, 市場上流傳狂人變臉的原因, 是因為中國認為有個別項目協議上讓步過多, 有意重新審視部分條款, 中國反口因而觸怒了狂人, 導致美國突然宣布本周五(10/5)加大關稅

狂人夠膽唱淡貿易談判皆因美國經濟數據佳, 而美股過去一個月表現亮麗, 在高峰上波動, 夠水位玩回吐, 但上証在五一黃金周長假期前已大瀉至3000水平, 不堪一擊, 特朗普就在這關鍵時刻用加關稅來逼中國就範, 狂人估計阿爺為了撐股市穩經濟或會妥協, 中國讓步與否就成為全球股市的焦點

我佛慈悲, 佛誕假期長周末 1) 暫不調升關稅, 用拖字訣繼續等下次開會  2) 中美達成初步協議 3) 反檯, 周五調升關稅, 貿易戰升級 4) 半反檯, 周五調升關稅, 貿易談判繼續

無論開邊瓣, 中國都係輸家

睇中港美三地股市的慣性走勢, 過去兩個月道指兩連跌例彈, 港股好少全周日日升或日日跌, 所以往後點都會彈一彈, 亦可扮見底來派貨及養牛牛

{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}

中港股市災味極濃, 繼續尋底

8/5 周三恒指收報29003, 大跌359點(最多下跌417點), 失守50.60天線

向下28800.28500.250天線28000邊

回吐一月升浪的0.382倍見28223

港股連續兩日彈上去隨即惹來龐大沽壓, 回補部份下跌裂口高見29480又插過, 今日又扮守得住29000來引牛入局, 磨左兩日, 28500~28950有肥牛超過四千張, 夠數開大餐, 時辰到了, 收跌周多數會在周四或五創新低, 港股弱勢已成, 吻別50天線後連60天線都穿埋, 繼續尋底冇眼睇,

貿易談判出事, 人民幣走弱會進一步拖低中港股市, 今次同燈神看法一致, 估計短線會插穿28500, 接近短線下跌目標到時或會有淡友開始食胡, 中美周末談判禍福難料, 大市雖然走弱, 其實淡友都有風險, 加稅及談判揭盅前中港美三地股市已偷步下跌, 跌勢過急, 嚴重超賣, 回補空倉買盤會湧現, 周五阿爺會否護盤(當天滬深股通關閉.老外冇得沽A股, 不過到下周二沽盤或會再度湧現), 中美雙方或會發出利好言論穩定人心, 周四五係創新低的時間窗口, 港股大方向利淡, 如擔心死貓彈的話, 短炒做淡就要睇位食胡

{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}

賤美或會於10/5增加中國關稅, 香港時間周五正午揭盅(後記: 狂人果然來真的, 大加中國關稅, 中港股市死得)

國家副總理劉鶴周四(9/5)起訪美兩天, 與美方進行第十一輪貿易談判, 有報道指中方曾考慮退出談判, 但擔心會對經濟構成沉重打擊, 所以如期赴美

港交所本周三(8/5).友邦本周五(10/5)公布季績, 騰訊下周三(15/3)公布季績

人民銀行將於5月15日、6月17日和7月15日分三次實施較低存款準備金率,釋放長期資金約1000億元人民幣。

MSCI將於5月14日凌晨公布半年度指數審議結果, 有關調整將於5月28日收市後生效

最新回應

c6
c6 2019/05/26
@soho*...

大元帥感恩💕💕

謝謝文章🙏🙏🙏

辛苦你了 {#icono_85} {#icono_85}

特x普應該無好報

🔥🔥🔥🔥🔥🔥

C6是97年的產品

但近日心情似97歲

你要保重不要為X普勞氣

美味雞煲
美味雞煲 2019/05/26
@soho*...

元帥 好文 👍🏾👍🏾👍🏾👍🏾👍🏾👍🏾👍🏾👍🏾😂

白皮豬 10 個有 9 個無積蓄 鐘意先洗未來錢 選左個魔鬼做總統 🙈😂

中國人真係 5 同 節儉生活 😅

收跌月...... 收到 🙋🏼‍♀️ 平均線 整數關口 裂口 😂👌🏿

soho*
soho* 2019/05/25

試下學下,依家阿爺最頭痛係出手護盤推高股價只會益咗老外高位出貨,結果都係畀老外沽盤推番大市落嚟,徒勞無功

18兄,大市落到28000時我都繼續看淡,只係估唔到連死貓彈都升咁少

soho*
soho* 2019/05/26

雞煲入市,除了睇牛熊表之外亦要睇裂口、平均線,以及整數關口,以前都試過到口肥肉唔食,突然掉頭殺另一邊