港特殊奧運健兒奪92獎牌好威風

2019/05/29 04:12:17 網誌分類: 生活

29 May

        　　本港特殊奧運隊代表今年三月喺阿聯酋舉行嘅「2019特殊奧林匹克夏季世界比賽」一共奪得九十二面獎牌，成績驕人！佢哋喺香港迪士尼樂園舉行祝捷會（見圖），Kelly當然去喝采支持佢哋啦，見到一眾特奧運動員嘅風釆之外，仲見到「體操王子」李小鵬同埋米奇同米妮，小妹好開心。

        　　奪得乒乓球雙金牌嘅陳子聰話，好滿意自己表現，最滿意係可以面對不同地區嘅對手，因為每個對手打法都不同，所以每次比賽都面對好大嘅挑戰。而在競技體操項目上連掃五金嘅麥倩婷，就話是次賽事中最難忘導師畀佢嘅指導，同自己嘅努力練習。當問及佢具體用了多少時間備戰，倩婷想了想後表示：「九年。」對於奪金一刻，倩婷回憶：「我只是想到可以畀老師和媽媽睇。」

        KellyChu