3~4/6 好淡通殺.牛死熊命危

根據港股的慣性走勢, 如果今個月恒指收跌的話, 月初就要向上擴大月波幅順道屠熊, 做頂打回頭就會繼續尋底, 到時牛牛亦養到肥肥白白, 如果今個月恒指收升的話, 月初就要向下擴大月波幅順道屠牛, 觸底回升彈上去尋頂及屠熊, 做短頂打回頭就會下試前底的支持力做第二隻腳, 如果守得住就會再沖頂

今日恒指續創新低, 剛好落到技術性大位26732/26800即彈, 亦符合大鱷操控大市的一貫手法, 秒殺肥牛趙完鬆, 貼價牛熊齊齊進場,

5月大舉屠牛之後, 牛熊分布均衡, 今日恒指波幅收窄, 大鱷玩點穴養牛熊, 結果係熊熊飛撲入市, 牛熊分布變成熊多牛少, 代表深潛誘因降低, 上攻挾淡誘因增加, 港股一直都係嚴重超賣, 尚欠一技術性大反彈來消化超賣, 現水平博反彈具值博率

恒指回吐升幅0.5倍黃金比率見27410, 雙底頸線在27260, 所以上周初恒指插穿27400後燈神就日日講彈高, 可惜大鱷唔聽話, 一路插到落26700附近, 不過我認為彈高早晚會出現, 因為技術上要後抽上去吻別大位, 只係等利好催化劑出現才能成事

由於消息面極淡, 買盤弱, 沽盤多, 港股只能等技術性反彈, 市弱高位通常係一瞬即逝, 不過收市如能上企關鍵位3天, 代表大市回穩, 向上阻力27000~27300, 如能收27300附近，就有望挑戰27500裂口區

恒指已連跌4天, 今年恒指最長跌浪係五連跌, 按照慣性走勢全周不會日日跌, 亦同樣代表大市本周點都會彈一彈，最好升2天就符合慣性走勢

近來大鱷一直咬住國指10400唔俾深潛, 想拖到上証及美股止跌回升, 到時就可借勢推番港股上去殺埋正在不斷下移的熊熊, 以及挾淡倉

港股繼續嚴重超賣, 人人都等技術性反彈, 但港股卻日日彈散, 大鱷好鬼奸，通常要好友心灰意冷, 大市才會彈高, 以閒閒地都有超過500點周波幅來看, 本周一係上27000, 一係見26500,

今年恒指未見過全周日日跌, 每周最少升1天, 多數升1~2天, 留意本周能否收26901樓上就知好友有冇誠意撐市, 如能打破慣性走勢連升3天代表大市回穩, 會再上攻尋頂，直至再有利淡催化劑出現才會再落山

~~~~~~~~~~~~~~~~~~~~~~~~~~~~~~~~~~~~~

港股全日成交只得$827億, 但沽空金額卻高達$132億, 沽空比率為16.01%, 勁多, 港股近平收, 但下跌股份卻大幅多過升股(17%升 vs 28%跌), 係托沽格, 不過大鱷大媽就操控著港股的升跌韻律, 唔想大市直插, 想玩跌下彈下來殺牛熊及好淡倉, 

資金流方面, 美元跌穿98, 人民幣跌勢亦放緩, 港匯轉強, 5月份老外大舉沽貨撤退, 但今日滬深股通突然出現大額資金凈流入, 老外瘋狂掃貨, 推動港股拗腰, 守住26700大位

一如上周所說, MSCI調動QQ減比重完成後, QQ就少左一批沽盤, 亦係今日QQ輕易就彈上$330大位收的原因之一, 不過升穿$330要企3天才收貨, 下一個阻力在$340,

恒指

50周線27635

23/5下跌裂口阻力在27523~27640, 有待回補

去年12月初雙底頸線27260

回吐反彈浪升幅的0.618倍26732

9/1/2019上升裂口25960~26192

250周線25367

國指

回吐升幅0.618倍見10571

23/5下跌裂口阻力在10504~10588, 有待回補

回吐反彈浪升幅0.786倍見10215

9/1/2019上升裂口10182~10270

恒指續創新低大舉屠牛, 五連跌醞釀反彈, 牛死熊命危

4/6周二收市~恒指收26761, 跌132點, 嚴重超賣

技術上港股明明要彈高, 但港股開市位已是全日高位, 單日轉向呈陰燭, 一開即插, 不過秒殺560張肥牛即彈, 大鱷一邊屠牛一邊刻意壓住大市頻頻玩彈散, 吸引淡友進場, 因為大鱷嫌26500樓下牛牛唔夠肥, 想養下先, 但市弱就吸引熊熊不斷下移至27000附近的屠殺範圍, 大鱷奸計得逞, 道指於3/6低見24680後止跌回升, 亦有助港股向上推進, 挑戰27000

今日恒指續創新低26672, 落到26732大位明明要彈高, 但大鱷夾硬再隊多一棍, 連26700牛都殺埋, 真係陰毒, 牛牛歸西, 往後彈高都唔關佢事, 收26800附近, 代表大鱷仍想上27000, 不過向上27000~27300阻力大, 由於消息面利淡, 加上本周有長假期沽壓效應, 連日下跌後如有反彈, 打開逃生門沽壓必定會大增, 好友有冇誠意撐市就要留意本周四能否收26901樓上, 是否高位一瞬即逝, 本周四收市如能上企26800關鍵大位, 代表下周會再上27000來擴大周及月波幅，淡友可能趁近日落26700已食胡

雖然恒指連跌5天, 但其實以收市計, 港股近日跌勢已放緩, 多隻指標股今日都冇跟隨恒指創新低係利好訊號, 大部份老肥牛已死, 回購亦增加, 阿爺亦繼續推出刺激經濟政策, 都有助好友反擊, 今年恒指未試過6連跌, 代表明日會作出反彈, 如能3天不再創新低就打破了慣性走勢, 係見短底訊號, 有望上攻27300.27500

5月份開局係牛牛大幅多過熊, 吸引大鱷落山食肥牛, 結果大鱷全月殺了22912張牛牛, 經過數周的大屠殺後, 如今整體牛熊分布係熊略為多過牛少少, 以往當牛牛死得七七八八大市就會拗腰向上, 沽空持續高企亦有誘因上攻, 逆向ETF買盤縮, 同樣預示反彈在望,

大鱷力守QQ$315, 推番上$325, 擺明係唔俾QQ落去回補$300附近的裂口, 代表大鱷唔想恒指回補26000附近的裂口, 想在現水平築底部署反彈

~~~~~~~~~~~~~~~~~~~~~~~~~~~~~~~~~~~~~

港股彈散定係彈高就要睇阿爺生唔生性, 因為中港股市通常係同步, 其實近日國指好硬凈, 冇插穿5月低位10316, 主因係上証守住5月低位2833, AH股關連性極大, 所以國指冇再深潛, 而恒指就補跌, 今日落到26672, 已跌至圓頂量度跌幅的短線目標, 等技術性反彈, 要留意14/5佛誕假期復市以來, 恒指收市最多升146點, 最多連升2天, 市弱沽壓大, 連升難, 如能連升3天或升幅超過150點就係好友反擊訊號,

恒指五連跌失守27000, 人人向下望, 但恒指恐慌指數大跌5.78%, 唔驚啵! 看來大戶都估計大市會作出反彈, 友仁大哥說今日是震倉, 我都覺得好似, 要震走好友牛牛才能彈高, 要嚇走熊熊才能插水, 老外連續兩日經滬深股通掃貨, 好少見, 代表上証或權重A股快將作出反彈

港股升跌由大鱷大媽話事, 大媽掃乜升乜, 沽乜跌乜, 當牛熊唔夠肥就會將大市點穴引牛熊入局, 再擇肥而噬, 港股即市多數跟上証騰上騰落, 無路可捉，但大鱷多數係追住牛熊來殺，因此牛熊分布具啟示作用

港股已累積龐大跌幅, 未見過似樣反彈, 隨著成份股陸續除息, 期指低水情況會逐步紓緩, 所以6月上旬(首兩周)有望挑戰27000~27300, 如有利好消息就會上攻27500(裂口區), 到打回頭就會繼續尋底