七一遊行隨筆

睇到網上即時新聞得知，有十三名警員被液體灼傷！呢種殘害他人嘅手法已經觸犯刑事，姑勿論用乜嘢理由，都冇法洗甩暴徒嘅罪名！西風向來主張：意見不合，純出於身處位置唔同而起嘅對立。如果真喺為咗香港七百幾萬人嘅福祉而發聲，咁雙方冇可能冇偈傾之餘，仲要以暴動為伏線嘅活動衝擊法治。後者打住冠冕堂煌嘅口號，行處心積慮目標險惡嘅勾當，以圖瞞騙世人。正所謂：司馬昭之心，難騙冷靜而有志之士。

據新聞報導，有示威者走到地盤偷走鐵枝並改裝成盾牌自衛，唔通呢種行為喺即興架？稔落喺受過正統訓練嘅有組織集團一手操控！背後有乜嘢目的，西風無從揣測。但眼見而家狀況，相信明眼人都知道【項莊舞劍，意在沛公】。心懷不軌嘅人，透過某種令人諸多揣測嘅幕後黑手，用種種衝擊手段去試中央底線。如果中央冇表態，則示威將會不斷升級！如果中央有表態，黑手又以一國兩際下阻止，甚至打壓中央唔好干預港人治港嘅原則。咁樣攪法，無論中央出唔出面，隻死貓都會食硬！到時追究誰是誰非，矛頭永遠插向中央，七百幾萬人仇恨自己主權國，達到籠裡雞作反，黑手呢隻黑狗攞正牌偷食得其所哉，反而示威群嘅白狗就當晒災囉。