點首歌比你聽4

今日西風推介比各位嘅[中文經典金曲]，喺鄭國江老師咁多首傑作之一嘅[隨想曲]：前望我不愛獨懷舊，名利我可以輕放手，是我的雖失去他日總會有，不慣全力尋求..... 呢首歌名起得好，呢首歌詞填得妙！西風不期然稔：如果人人都做到呢首歌名，喺隨想後，得到唔會樂極忘形，得唔到唔會痴憎怨恨，喺幾咁瀟洒超然，別樹一格。

隨想曲嘅精髓就喺一個[隨]字！冇預定，冇計謀，臨時起意，稔到就做。既唔會委屈自己，又唔會傷害人哋，更無傷大雅，最難能可貴嘅喺不失本心。據西風所知，包括連西風在內，99%都只喺從自我角度同立場去立論，或採取措施嚟守護或應該或唔應該屬於自己嘅利益！只要觸碰到自訂嘅底線時，就有理冇理起晒槓底下打壓對手先。可能出師有名，可能無理取鬧，可能意氣用事等等各適其式！

隨想嘅對立面，就喺偏執！凡不被自己接納嘅，就算對方幾啱都好，冇得傾就冇得傾，冇面比就冇面比！所以，凡喺偏就唔慌會主持公道，凡喺執就肯定堅持成見。由於想得到一啲唔屬於自己嘅人事物而變成[貪]；得唔到想得嘅人事物而發火就變成[嗔]；念念不忘所得唔到嘅人事物而唔能夠釋懷放下變成[痴]！再經過貪嗔痴流轉身心而衍生出痛[苦]，受到意識上嘅騷擾，火燒心嘅煎熬，令到日有所思，夜有所夢。

最後呢個[曲]字！除咗解作曲譜或者音樂外，亦可以借用成委曲妥協，好似道德經名句：[曲則全，枉則直]！世事枉枉難盡如人意，有時被環境所逼，有時要換取利益，有時要顧全大局，所以唔可以唔dup低頭躀一鋪作出讓步，作出妥協。雖然好老實咁講喺唔咁心，但喺為咗長遠計，最終都喺要作出犧牲嚟達致平衡。

當然，呢啲只不過喺西風個人嘅淺知淺見！有可能有人接受認同，亦有可能有人唔接受唔認同，咁又如何吖？就喺因為人人都可以隨時[隨想]，先至會人多意見多！能夠從咁多異見入面攞到大眾所需要嘅，縱然自己有所犧牲妥協讓步，又有乜嘢洩底喎？你話喺唔喺吖？