點首歌比你聽7

今日，西風想推介由黃霑先生填詞，羅文先生主唱嘅【強人】！呢首歌詞夠晒淺白直接，大部份以提問方式，令聽眾起反思作用：【是與非，如何分對錯？恨與哀，誰人解因果？敵友之間紛爭，難為彼我！恨愛可有界線？同是分不清楚.....】

是非對錯以及恨愛，好多時喺基於自己所企嘅角度以主觀嚟立論，未必符合身邊客觀環境所引起嘅變化，因此有差異，甚至喺對立。當然，從自我立場出發未必唔啱，但喺好難唔會因為差異而造成誤會。由於對立，一定會企硬自己嘅睇法同立場，自然令到雙方話不投機，此起彼落你嚟我往咁互相出招，導致各有勝負，甚至兩敗俱傷都話唔定。

曾經有電影電視嘅對白都講：【有人嘅地方就有江湖，有江湖嘅地方就有是非】！據西風了解，所謂是其是非其非(即喺啱就喺啱，錯就喺錯)，唔喺普通人能夠有碗話碗有碟話碟咁誠實。反而遮遮掩掩糊糊混混咁諸多解釋，諸多藉口嚟自欺欺人！冇幾多個人能夠面對千夫所指之下承認自己不足，喺不足嘅情形之下犯咗規矩而做錯事講錯嘢。

講番轉頭，有邊一個，包括西風在內，唔戴假面具做人？幾時唔喺講嘅一套而做嘅喺另一套？所以話姊，99%以上都喺雙面人，各有各自以為是嘅睇法，亦各有各拼死保護嘅利益，更各有各嚴重防範嘅底線，你衰呢樣而我衰嗰樣。因此，你唔好嘰gut我，我唔好吱咗你，咁就你好我好，彼此相安無事。如果唔喺，你踩我時我篤你，結局就會好難堪！

呢首歌詞仲寫住：【在世間，成敗轉眼就過。弱者，強人都犧牲多】，可見得無論邊個年代，身處邊個國度，總會有天災人禍發生。前者喺突發性，而後者則喺積累性；前者可以賴於天氣，而後者就肯定喺別有用心嘅人做埋啲唔見得光嘅嘢，最可恨嘅喺連累無辜嘅人做咗犧牲品。其實成功又好，失敗又好，強人又好，弱者都好，喺歷史嘅洪流內只屬於霎時片段刹那光芒，到結局嚟到，雙方同樣歸零。好彩嘅仲有傳記小説流傳去警惕後人，唔好彩嘅連一言半語都冇得留低，後代唔知前面發生過咩嘢事！

講到呢度，西風不禁稔起名句：【青山依舊在，幾度夕陽紅】？生前死要面所以爭餐飽，死後又冇可能帶走任何人事物？爭到番嚟只喺益咗未亡人或親人或後代，究竟爭嚟爭去有乜謂呢？