賠率

操作手法錯誤，大慨我都一樣要從錯誤中學習吧。

其實我以前都睇好多投資、投機嘅書，但嗰時集中學者知識，而且我以為窩輪只係『高風險投資產品』– 無記錯，以前好多時啲窩輪廣告都係用呢個形容詞，無留意依家仲有無咁樣。

早前响陸羽仁先生嘅網誌，其他網友爭論投機和賭博是否有分別，在我來說，哲學意義大於實用，因為兩個操作手法接近 – 限注、睇鐘、贏就谷、輸就縮、手風唔順唔好玩。但其實我覺得在理論層面，投資、投機及賭博，甚至乎買賣保險，或出門口帶唔帶傘，都涉及計算或然率，全部都是為未來作一個估算，除了要睇事件發生嘅或然率，更加重要係睇賠率。

用賭馬係最佳例子，誇張一啲，馬會其實都係賭緊馬，佢一場隻隻馬都賭，但每隻馬賠率係睇每隻馬入幾多非而定，直接控制賠率，總之計埋佢一定每場有錢賺 – 另一方面，陸SIR都有提過，一些賭馬集團，見散客入非而引至賠率變更，跟佢哋睇晨操嘅機率有出入，可以一場買幾隻馬，雖然控制唔到賠率，贏面都大好多。股市OVERSHOOT頂或底，也是因為散戶入非而引至賠率變更，和機率不合稱。畢非特買股都係類似呢種情形出入市。

不公平嘅賠率，係入賭場長賭必輸嘅原因，例如21點係閒家爆煲先，輪盤37個冧巴但只賠36個。就算係好股，高價買入就會有賠率不足嘅問題。窩輪更加唔使講，先賺買賣差價，又要俾輪商佣金，等於賭場先收入場費，跟住荷官抽水，而且在某情度上，引申波幅同你改埋賠率。

但如果間唔中入賭場，都可以有錢贏，當然係來自其他賭仔。在統計學有個Central Limit Theorem，可以間接解釋點賭仔有贏有輸，但賭場必贏。網友日日講買牛熊，而唔係等待順勢、「值搏率」高嘅時候，最終會輸俾統計學。但只要肯止蝕，等於睇鍾離開賭場，起碼唔會死人。

我和經紀朋友，買輪時都鍾意直接用賭博呢個字眼，覺得會提醒自己唔好講咁多基礎因素，而係跟住個勢同其他參與者去鬥傻。

某程度上，在不同場合用適當嘅操作手法，目的是在改善賠率。