王維基驚喜派對o氹愛妻政商名人齊為袁莎妮慶生

2019/11/01 04:12:25 網誌分類: 生活

01 Nov

        　　香港總商會行政總裁袁莎妮（Shirley Yuen) 昨日好忙碌，中午忙完一年一度嘅商界聯席午餐會，晚上老公王維基（Ricky Wong）為佢慶祝生日，以為二人世界，點知Ricky搞咗個驚喜生日派對，仲送上香吻同熊公仔。喺派對上，新聞人物唐英年、前「財爺」曾俊華、「田大少」田北俊等名人好友到賀，場面熱鬧！

        　　Ricky一早同Shirley話，要帶佢去君悅酒店食足重八兩嘅大閘蟹，二人去到君悅，忽然轉咗場，當Shirley一踏入房間，就有一大堆彩帶飄落，Ricky唔單止安排咗大生日蛋糕，又開支九公升嘅大香檳，慶祝太太生日，跟進送上兩隻半個人咁高嘅熊公仔，又sweet又浪漫。二人合照時候，Ricky錫咗Shirley一啖。Ricky喺商界素有「魔童」之稱，原來私底下係一名「柔情魔童」。

        　　唔少老友、舊同事都出席呢個生日派對，包括呢排不時登上新聞版嘅「唐唐」唐英年、前「財爺」曾俊華、「田大少」田北俊等人，大家都為Shirley牛一乾杯。

        Kelly Chu