KellyChu - 馮漢柱1800日影像記憶展 | Executive日記

資深攝影記者馮漢柱會喺每日行過嘅地方即興影相，並為作品標記日期，一日復一日，累計5年咁長。佢近日就舉辦展覽，展出呢1800日影低嘅攝影作品，同觀眾分享影相同記憶嘅有趣關係。

　　馮漢柱透過獨特嘅視覺，將街上遇到嘅人與事拍下，呈現全新意象，好似其中一張相，拍咗三母子，三人分別着上紅白藍色衫，Kelly第一眼睇落無特別，但眨眨眼再睇，發現係法國國旗嘅顏色。其實，馮漢柱喺2019年1月１日開始，用app喺每張相上面加上日期，因為佢睇返舊相，發現自己已忘記張相嘅事，「有一次有朋友畀張我影嘅相我睇，喺影九龍皇帝（曾灶財）嘅墨寶，問我係喺邊度影，我完全唔記得」、「好多時話，相片留住記憶，幫助記憶，但原來唔一定係」。

　　睇返5年來嘅相，馮漢柱話好似細說一個地方嘅變遷，頗有感慨。大家想分享佢相中嘅趣味，由即日起到5月26日（需預約：https://artellex.simplybook.asia/、逢星期一休息），可到荔枝角長順街1-3號新昌工業大廈2樓204A室參觀。

KellyChu