KellyChu - 《九龍城寨之圍城》揚威康城影展 楊潤雄：功夫片說好香港電影故事 | Executive日記

　　第77屆康城影展喺當地時間5月14日晚上開幕，文化體育及旅遊局局長楊潤雄率領香港電影業代表團出訪參與，並同海外觀眾一齊欣賞《九龍城寨之圍城》。楊局長話，能夠將一套滿有香港情懷嘅電影帶到康城係非常有意義，希望藉此可以繼續說好香港電影故事。而Kelly亦見到法國人非常鍾意港產功夫片，並報以熱烈掌聲。

　　由鄭保瑞執導嘅《九龍城寨之圍城》係一套以昔日九龍城寨作為背景嘅武打片，講述80年代年輕人成長故事，同時重現舊香港情懷。電影口碑理想，本港票房已破5500萬元，內地上映17日總票房更突破5億元人民幣，排全國票房第二。

　　電影更入圍康城影展嘅午夜展映單元，楊潤雄前晚同鄭保瑞導演及其團隊，於康城嘅大劇院與海外觀眾一齊欣賞。電影完場時，全場觀眾起立歡呼，並鼓掌近10分鐘，鄭保瑞多謝大家入場欣賞，亦感謝康城電影節揀咗呢套非常本土嘅動作電影，場面熱鬧感人。

　　小妹有幸可以喺現場共襄盛舉，認為法國人對電影作品非常尊重，一眾美男美女都盛裝打扮出席觀影。問及楊局長對香港電影登上國際舞台感受，佢話係說好香港電影故事嘅好例子，小妹更認為呢個亦係香港武打片喺國際大放異采嘅契機。

KellyChu