KellyChu - 捐款80萬元助癌童遺愛人間 生命鬥士楊嘉驃過世已辦告別禮 | Executive日記

抗癌勇士楊嘉驃（Gabriel）喺復活節前離世，佢生前曾捐款80萬港元予兒童癌病基金，遺愛人間。Gabriel嘅親友昨日透過其IG公布離世消息，指Gabriel已於3月下旬復活節前在家人陪伴下離世，亦為佢舉行咗簡單嘅告別禮，並以Gabriel生前創作嘅歌詞作結：「就算我化作灰塵，漂向天上嘅雲，唔會忘記我嘅根，永遠守護我最親。」

　　Gabriel喺2022年4月確診胃癌，曾接受化療並切除整個胃部，但之後再發現肝臟有腫瘤，至今年2月，佢透露自己病情惡化，但仍勉勵自己盡量苦中作樂。Gabriel亦提到自己曾嘗試服藥輕生，好彩被親友及時發現，鼓勵同路人即使痛苦都唔好放棄。

填詞遺作：永遠守護我最親

　　佢生前解釋捐款嘅決定，話自己經歷過癌症，明白到癌症係好痛苦，難以想像小朋友同埋佢哋嘅屋企人，要面對呢啲痛苦，所以希望可以幫助佢哋，鼓勵患癌兒童化身成小鬥士，鼓起勇氣去戰勝病情，又呼籲大眾要注重身體檢查，及早發現癌症早期病徵。

　　兒童癌病基金曾指會根據Gabriel意願，將該80萬元用作患癌兒童嘅藥費資助，預計可以資助5至6名小朋友一年嘅藥物開支。

　　未婚妻Christine一直陪伴Gabriel對抗癌魔，更於Gabriel確診胃癌後主動提出訂婚。佢形容Gabriel係佢見過最勇敢嘅人，對其捐款決定感到驕傲。28歲嘅Gabriel畢業於香港大學社會工作學系，曾任職投資銀行及成立環保初創企業。

KellyChu