KellyChu - 復刻《重慶森林》橋段 漫步中環 泰國男神「朝偉上身」為港拍宣傳片 | Executive日記

　　泰國影星馬利奧毛瑞爾（Mario Maurer），日前以第17屆亞洲電影大獎青年大使身份，受邀到港參加頒獎典禮，並同旅發局拍攝咗一套宣傳片。拍攝期間，好崇拜本港著名導演王家衛嘅Mario，竟然「朝偉上身」，穿上電影《重慶森林》中嘅警察戲服，扮戲中嘅梁朝偉，喺中環自動扶手梯一帶遊走。小妹覺得，真係同朝偉一樣型！

　　Mario憑泰國電影《愛在暹邏》、《初戀那件小事》及《淒厲人妻》，紅遍全亞洲，過去更同蔡卓妍合演電影《感動她77次》。對港產片情有獨鍾嘅佢，於是親自建議遊覽電影拍攝場地，首站到訪戲迷最愛嘅紅磡寶石戲院；之後，佢仲「朝偉上身」，穿上《重慶森林》中嘅警察戲服，學梁朝偉，遊走中環至半山自動扶手電梯一帶。Mario話：「當我欣賞王家衛電影嗰陣，我睇到香港嘅生活日常，所以我很鍾意喺電梯一帶搜尋有趣嘅小店、唐樓及理髮店。」值得一提係，拍攝期間，Mario仲到訪公利真料竹蔗水，一嘗古法製作嘅清甜蔗汁。

　　之後，Mario亦換上茶餐廳夥計嘅恤衫，叼住牙籤，變身成為《行運一條龍》中周星馳飾演嘅何金水。宣傳片已經可以喺旅發局YouTube平台睇到，大家記得睇！

KellyChu