星島新聞集團正能量NO.1 免費派口罩 市民讚有heart
2019/12/19 04:12:49 網誌分類: 生活
Kelly聽星島負責人講，雖然近日市面口罩供應量多咗，但疫情一日未退，市民一日出街都要繼續戴口罩，每人每日一個，條數都幾襟計，小妹呢幾個月買口罩都買到窮，莫講話一班基層市民，要長期應付買口罩嘅開支都咪話唔難捱！今次星島新聞集團免費派口罩，幫到有需要嘅人之餘，大家仲可以慳得一個得一個，正！唔怪得小妹旁邊位太太攞到免費口罩後開心到叫出嚟，話雖然每人只限攞一包，但都好多謝星島新聞集團咁為得市民，咁有心呀！
共渡時艱 幫得就幫
除了昨日，Kelly仲八到上月《東周刊》義工隊向幾間社福機構送出嘅五千個口罩，係由匿名善長慷慨捐贈，受惠機構包括協康會、路向四肢傷殘人士協會同思道平台，佢哋服務嘅對象都係弱勢社群，好似基層家庭、長者同傷殘人士，經常要出入醫院做檢查，加上當時口罩供應未穩定，叫佢哋自己撲口罩難上加難，真係要幫得幾多就幾多！善舉仲感染到社福機構嘅同事，將自己僅餘嘅口罩轉贈畀其他人，令更多人受惠O添！負責人話，明白送出嘅口罩數量唔算多，不過相信只要香港人每人做多少少，加起嚟嘅力量就會好強大，Kelly極之同意！希望香港人同心協力，好快可以走出困局，戰勝疫境啦！
Kelly Chu
■大小朋友都受惠！
■星島新聞集團送口罩，與香港市民同心抗疫！
■讀者除咗攞到免費《頭條日報》，仲有口罩送！
■3000個口罩ready送出喇！
■星島新聞集團員工上下齊心，一早為派口罩做準備！
回應 (0)
我要發表