KellyChu - 旅發局募「旅遊義工」倡好客文化 | Executive日記

為推動香港嘅好客之道，旅發局推出「旅遊義工」計劃，招募培訓對旅遊業有熱誠嘅市民，等佢哋同旅客傳揚香港文化、推介地道特色。大學嗰陣已經加入計劃嘅Gaby就話，從細嚮往城市節奏，但透過計劃，發現香港自然景色如畫，對香港深度旅遊有另一番體會。原來有咁多有心人熱心推廣香港，小妹相信香港一定繼續客似雲來！

　　唔少「旅遊義工」昨日到場分享經驗。現職金融界嘅資深「旅遊義工」Marco話，透過計劃重新認識香港，除咗可以世界各地旅客一齊發掘香港好玩之處，佢依家已經成為名副其實嘅「香港通」；前任職跨國公司管理層嘅Agnes就話，做咗「旅遊義工」後仲忙過退休前，不過每次幫到旅客，都「好似做完一次大笑瑜伽，心情開懷又滿足。」

　　旅發局企業事務總經理李樺就透露，計劃現時有65名唔同界別的義工，其中三分一係在職人士，包括學生、公司管理人員等，6成義工已服務超過10年。

　　小妹就提提各位感興趣嘅有心人，新一期計劃即日起至下月31日接受全港市民報名，成功入選者會接受培訓，並喺旅發局遊客諮詢中心、旅發局舉辦嘅大型活動，以「旅遊義工」身份，向世界各地旅客介紹香港生活文化，推介地道旅遊建議。

KellyChu