KellyChu - 理大日內瓦國際發明展奪45獎 | Executive日記

香港理工大學（理大）喺第49屆日內瓦國際發明展，突破歷年成績，43個參賽項目成功奪得45個獎項，包括兩個特別大獎、五個評審團嘉許金獎、18個金獎、13個銀獎，以及7個銅獎，當中19個獲獎項目都係理大於InnoHK創新香港研發平台研究中心與其他國際頂尖院校共同開發嘅研究成果。佳績反映本港科研實力不斷提升，可喜可賀！

　　一眾獲獎項目中，由理大眼科視光學院主任及教授兼眼視覺研究中心副總監紀家樹領導研究團隊所研發嘅「全球首個便攜式高清角膜地形圖儀K-Shape」，榮獲沙特阿拉伯代表團特別大獎及金獎。

　　角膜係眼睛最重要嘅光學元件之一，其曲率對眼睛嘅光學特性，尤其眼球散光光學屬性影響深遠。為咗普及角膜地形圖儀嘅應用，研究團隊攻克手提式儀器嘅技術難關，研發出輕巧、便攜且精準度高嘅角膜地形圖儀K-Shape。K-Shape目前正處於最後測試階段，期望明年初推出市場，讓散光檢測走出診所，從而建立更完善嘅資料庫，為兒童視力問題作出早期診斷。

　　另一項目ProRuka——通過無線聲肌圖控制的新型前臂義肢，由理大梁顯利生物醫學工程教授鄭永平帶領，獲得評審團嘉許金獎。ProRuka係一款可獨立控制手指嘅機械前臂義肢，以3D打印度身配置於使用者嘅殘肢上，透過聲肌圖結合人工智能，可即時解讀手部及手指活動，形成訊號並控制義肢，能準確做出複雜手勢，幫助使用者重拾自信、獨立和應有的生活質素。

KellyChu