KellyChu - 卓永興落區歎茶探工友 勉「服務一定要好」 | Executive日記

　　昨日係五一勞動節，政務司副司長卓永興就聯同工聯會，到旺角嘅倫敦酒樓探訪工友。期間卓副司長歎咗個靚茶，並同喺酒樓做咗40年嘅部長閒聊，形容「點心出品好係一回事，服務一定要好，因為我好衰嘅，服務唔好一次就ByeBye！」佢強調，服務係好基本嘅事，「打工仔」一定要有職業道德。小妹覺得司長講得好有道理，出去食嘢，如果服務好，真係加分好多！

　　卓副司長同喺酒樓做咗40年嘅譚部長交流時，向對方表示，自己都是第一次深入了解酒樓員工嘅工作，形容「唔係你哋，我哋都無好茶飲」。佢又笑言，酒樓唔好「一籠蝦餃有4隻」，因為「兩公婆食唔到咁多」，最好每籠有幾款點心，就可以食多幾樣，又話飲食業「要諗計吸引多啲銀髮一族出嚟消費」。

　　司長又話，社會可能覺得食肆結業潮同北上消費相關，但強調消費者好精明，邊度性價比高，就會光顧邊度，所以港人要自強不息，強調好地方係「唔愁無客」。而遇到首次來港、來自澳洲珀斯嘅遊客，司長仲主動上前打招呼，向對方介紹香港點心！

許正宇車廠探工友

　　另外，財經事務及庫務局局長許正宇昨亦到港鐵九龍灣車廠探訪工友，期間了解車廠嘅日常車務及維護保養工作。

KellyChu