KellyChu - 逾300件法國百年服飾亮相故宮館 | Executive日記

法國巴黎一向被譽為時尚之都，源於其歷史悠久嘅文化底蘊，小妹知道嚟緊暑假都可以喺香港，欣賞到巴黎古典貴族服飾，一究早已走在潮流尖端嘅服飾。香港故宮文化博物館將於6月26日至10月14日推出大型特別展覽「法國百年時尚——巴黎裝飾藝術博物館服飾與珠寶珍藏，1770–1910年」，首度於亞洲展出該館300多件珍貴典藏。

　　巴黎裝飾藝術博物館擁有法國國家最重要嘅時裝和裝飾藝術收藏，適逢中法建交60周年，是次展覽為西九文化區慶祝此里程碑而推出嘅重要展覽之一，當中幾乎所有展品都係第一次喺亞洲展出，部分甚至從來都冇離開過法國，亦係近年喺亞洲規模最大嘅同類展覽。

　　展覽分為5個單位呈現1770年代至1910年代法國服飾史，18世紀華麗絕美嘅宮廷禮服，展示咗法國王室成員和貴族如何利用禮服，喺宮廷內外展現其身份和地位；至19世紀中期，形如鳥籠嘅大型硬質裙撐，成為法國以至全歐洲時尚特色，塑造出貴族女性嘅沙漏體形，同時象徵華麗服裝為人們帶嚟嘅愉悅和痛苦。

　　亮點仲有享有「高級訂製之父」美譽嘅查爾斯．弗雷德里克．沃斯，為歐仁妮皇后（拿破崙三世之妻）設計嘅一件裙裝。另一件珍品係十八世紀法國男性貴族嘅外套，其採用法國絲綢面料，而紋樣仿當時被視為奢侈品嘅中國絲綢，從中可以看到中法交流。

KellyChu