迪園大廚炮製創意美食 開胃菜甜蜜橙香衝擊味蕾
2020/01/15 04:12:22 網誌分類: 生活
胡發祺係迪士尼樂園酒店晶荷軒嘅廚師長,Kelly以往試過佢嘅手藝,非常之喜歡。今次佢約小妹入園,叫我做快樂嘅試菜員。首先上桌嘅係amuse bouche ,以橙汁同酒漬蘿蔔,盈滿香橙嘅甜蜜,帶微微嘅酒香,味蕾都笑了,即刻醒晒,迎接後來嘅多道美食。
Kelly最鍾意嘅,係西班牙大紅蝦兩食,蝦身煮熟加上靚芡汁,肉嫩鮮美,真係無得輸。個大蝦頭就炸香,咬落去脆到有聲,仲嘗到甘香嘅蝦膏。小妹笑笑口咁同胡師傅話,其實係三吃,因為佢仲把蝦膏取出,釀喺米奇頭形狀嘅撻皮之中,靚到唔捨得食落肚。
主食係蠔皇原隻鮑魚炒飯拼雞油豆苖,大大隻炆鮑魚貼上金箔,置於蟹肉炒飯上,賣相誘人,但最有心思嘅係個飯兜,好細心把小南瓜挖空而成,加上兩個紅蘿蔔車輪,每個輪上都有米奇頭標誌,原來大廚要塑造《仙履奇緣》中嘅馬車咁話!呢一餐真係一邊食、一邊回味迪士尼嘅精采漫畫人物,係好味又有趣味嘅一餐。
Kelly Chu
西班牙大紅蝦
蠔皇原隻鮑魚炒飯拼雞油豆苖
開胃菜以橙汁同酒漬蘿蔔
回應 (0)
我要發表