遭食環控「食物室不潔」罪 觀音庇佑決上訴 巧饍坊終還清白
2020/10/03 04:12:16 網誌分類: 生活
今次喺食店罕有拗贏食環署嘅案例,引來飲食界同司法界極大關注,更形容楊太親身答辯係「盲拳打死老師傅」。楊太話,首次裁決前,有兩位律師朋友都勸佢認罪交罰款,認為「人哋有心做你」,加上食環嘅官司一向難打,無謂浪費律師費。但楊太認為自己無做錯,決定親自出庭辯護,可惜被判罪成。
佢事後仍感冤枉,信佛嘅佢發現店中放置於觀音像旁嘅鮮花久久未開,決定將上訴與否嘅決定交畀觀音,而鮮花翌日竟全數盛開,終決心上訴。
高人幫忙都係關鍵。楊太一位退休律師朋友「睇唔過眼」出手相助,兩人花咗一星期參考以往案例,並用四小時寫好開案及結案陳詞。楊太庭上據理力爭,終贏得官司。楊太認為,今次勝訴感謝觀音庇佑,已經去咗車公廟還神,日後會繼續做好自己。
Kelly Chu
■楊太將官司交畀觀音,鮮花翌日竟全數盛開,終決心上訴。
■「詠藜園」旗下齋菜館「巧饍坊」。
回應 (0)
我要發表