KellyChu - 副司長贈「芳」字 勉DSE生奮勇前衝｜Executive日記
2022/07/18 04:12:02
網誌分類:
生活
中學文憑試會在本周三放榜，教育局局長蔡若蓮發起「一人一字勉考生」行動，包括特首李家超等多位政府官員響應，政務司副司長卓永興就選咗個「芳」字，話學生處於人生「芳華」，鼓勵佢哋無論文憑試點樣，都要奮勇前衝。
卓永興為考生送上一個「芳」字，佢話，「芳」係美好嘅意思，而青春又叫「芳華」，形容學生正處係人生花季，鼓勵佢哋不論文憑試成績點樣，都要係人生路上奮勇前衝。商經局局長丘應樺以一個「思」字，鼓勵應屆考生「慎思明辨」，而無論考試成績點樣，只要學生學會「慎思明辨」，將來必成大器。發展局局長甯漢豪就揀咗「信」字，指同學將來無論繼續升學或投身職場，都「不要怕，只管信」，向住標竿直跑，一定可讓人生發光發熱。環境及生態局局長謝展寰則選「路」字，勉勵考生懷着希望，開闢自己的嘅道路。而李家超早前都送咗個「同」字畀考生，強調只要大家「同」心合力，就可以「同」為香港開新篇。
蔡若蓮選擇「定」字畀學生，因為佢諗起儒學經典「四書」中嘅《大學》，裏面有句：「知止而後有定，定而後能靜，靜而後能安，安而後能慮，慮而後能得」，強調只要學生及早同家長老師規劃未來方向，向住目標堅定前行，就一定可以「條條大路通羅馬」。
回應
(0)
我要發表