KellyChu - 港鐵退休義工成立義剪隊　出心出力獲婆婆讚剪得好靚 | Executive日記

　　港鐵公司喺2005年成立「鐵路人 鐵路心」義工計劃，當年已加入成為義工嘅譚艷艷，喺港鐵工作咗30多年，2018年退休之際與幾位「拍檔」一同成立義剪服務隊。團隊上周六到訪伸手助人協會樂富護老院，為40多名院友義剪，迎接中秋佳節。

　　譚艷艷指，多年來喺唔同院舍做義工，發現義剪嘅需要，因此成立義剪隊，雖然團隊每次出動前，都要額外撥出時間及精力預備，但完成活動後都感到滿足，珍惜自己仲有能力幫助社會上有需要嘅人。

　　義剪隊義工呂錦珍認為，剪頭髮能直接按長者需要提供服務，亦可以同佢哋傾吓偈，曾為一位因接受癌症治療而剩下幾根頭髮嘅婆婆義剪，其實婆婆目的唔係只想剪髮，而係想分享其生活及往事。

　　院長謝雪紅形容義工非常細心，會同院友溝通了解髮型喜好，院友們對活動都好滿意。參與今次活動嘅82歲巫婆婆指，義工「講嘢好聲好氣，細細聲」，覺得剪咗頭髮後好靚、好乾淨。

KellyChu