KellyChu - 國慶賽馬日大把節目等你入場 表演市集應有盡有｜Executive日記

十一國慶大家諗好去邊玩未？香港賽馬會10月1日就會喺沙田馬場舉行「國慶賽馬日」，當日除咗緊張刺激嘅賽事，仲有多項精彩節目，包括著名男高音現場獻唱、花式跳繩表演、傳統工藝市集、體驗VR從化馬場虛擬遊，現場仲有主題美食，大家記得入場！

「國慶賽馬日」開幕匯演於10月1日中午12點會喺沙田馬場馬匹亮相圈舉行，現任上海歌劇院藝術總監暨著名男高音魏松將獻唱經典名曲，並領唱國歌。大會亦邀請中國香港跳繩總會中國香港代表隊表演大型花式跳繩。另外，本地著名敲擊樂團《激鼓》，會演奏慷慨激昂嘅鼓樂！

小妹亦推薦大家，可以行吓公眾席嘅「古藝市集」，市集會展出四位內地工藝師嘅民間工藝作品，包括麥稈畫、剪紙、面塑及盤扣等，大家仲可以現場同工藝師交流，認識傳統民間手工藝！

Kelly Chu