KellyChu - 佐藤健大讚港式湯水 明禎行金魚街宣傳香港魅力｜Executive日記

旅發局繼續宣傳香港嘅獨特魅力，今次就搵嚟全球各地多位藝人來港拍片，包括出演《First Love 初戀》嘅日劇男神佐藤健、荷里活知名影星、《我的超豪男友》男主角亨利高汀（Henry Golding）、大馬「女神」林明禎、有「國民初戀男」、「浪漫匠人」之稱嘅南韓人氣演員丁海寅，真係星光熠熠！佐藤健仲透露，原來最鍾意飲港式湯水，仲忍唔住用粵語大讚：「好味！」

佐藤健早前嚟港出席公開活動之餘，仲喺旅發局安排下，到中環米芝蓮三星中餐館，品嘗粵菜晚餐。佢一邊食、一邊欣賞維港美景，仲透露自己好鍾意港式湯水，而且好食到用粵語大讚：「好味！」；男神之後又到今年「亞洲50最佳酒吧」榜上有名嘅香港酒吧，品嘗特色雞尾酒。作為狂熱嘅藝術愛好者嘅佢，又到M+感受當代視覺文化。佢話：「全球沒有一個地方像香港一樣，能擁有自己獨特的文化。如果我再和朋友去香港旅遊，一定會帶他們來。」

Henry Golding雖然只係快閃香港24小時，但仍不忘到訪中環特色酒吧，飲一杯美酒；女神林明禎就行旺角金魚街，同傳統排檔嘅廟街夜市，感受香港多元地道文化 ；丁海寅坐咗香港摩天輪，又到天台酒吧，欣賞摩天高樓林立同璀璨燈火。

另外，為響應政府推動夜經濟，多個夜市已經揭幕喇。星光大道同K11 MUSEA喺尖沙咀合辦嘅「星光夜市」，上星期首個周五及六晚人來人往，大獲市民好評。大家今個周五、六晚記得繼續到場支持！

Kelly Chu