KellyChu - 全城追尋「L君是誰」 立會議員食飽借尿遁 記者夾錢埋單｜Executive日記

新一屆議會上任快2年啦，議員90人咁多，Kelly到依家都識唔晒，但最新一期《東周刊》爆趣料，話跑政情新聞嘅記者議論紛紛，話有新議員喺傳媒飯局尾段，借尿遁走人兼唔找數，據悉其中一個係L君。消息一出，隨即成為政商界熱話，全城競猜「他是誰」，連Kelly都開始惡補各議員姓甚名誰。

《東周刊》報道引述消息人士話：「部分新議員現在不但從不會主動與相約記者聯誼，甚至有傳媒伸出友誼之手，主動致電邀約午餐小聚互相認識了解議員議會工作等，也遭回絕，部分人甚至認為不需要跟傳媒打交道。」報道話，最近有多位新議員分別應約出席記者飯局，期間談笑風生，不過去到尾段，就遲遲唔主動舉手埋單。當記者提出差唔多要起程工作，議員就搶先去洗手間，結果一去無回頭，要一班記者夾錢埋單。政圈就盛傳，呢幾位議員借尿遁，已經唔係第一次。

報道亦引述消息話，其中一位借尿遁嘅議員係L君。報道隨即成為熱話，全城「猜猜他是誰」。現屆立法會共有20個議員姓氏係L開頭，其中唔少議員昨日都喺社交媒體發文澄清，話報道所指嘅「L君」唔係自己。Kelly覺得呢單真係政治奇聞，亦係好好玩嘅「猜猜他是誰」遊戲，但新一屆部分議員透過咁「出名」，又唔係幾講面子喎！

Kelly Chu