KellyChu - 逐步快高長大成「大犬」 網民搞gag「小犬」颱風成長路徑圖｜Executive日記

風暴「小犬」嚟緊香港，雖然天文台發出一號戒備信號，不過唔少網民都好淡定，話今次呢個風相當之cute，有一個「最好聽嘅颱風名」；仲有人幫「小犬」嘅行走路線插圖，顯示佢點樣一步步成長為「大犬」，俘虜咗包括小妹在內一眾網民嘅心。

唔少網民都話，「小犬」呢個名咁cute，一啲都唔似破壞力驚人嘅颱風；有人仲靈感爆發，喺「小犬」路線圖插上多張真實狗狗照，顯示佢點樣一步步成長為「大犬」，但去到香港，就變咗隻溫馴嘅「乖犬」；亦有人喺氣象圖整咗隻白色狗仔出嚟，都幾似「小犬」真身！

其實自2000年起，國際組織「颱風委員會」就用有特色嘅名命名熱帶氣旋，今次「小犬」（Koinu）呢個名，就由日本提供，亦指「小犬星座」，位於宇宙「冬季大三角」。

另外，民建聯原定9月8日舉行籌款晚宴，不過遇上「世紀黑雨」延期。據悉晚宴會改期到今日舉行，唔知會唔會又唔好彩，撞正惡劣天氣再延期呢？

Kelly Chu