KellyChu - 新地匡智會撐環保搞繪畫比賽 同學仔嘅作品冇得彈｜Executive日記

新鴻基地產一直好重視環保同ESG，旗下The Point商場綜合會員計劃，就首度同匡智會合辦「親親大自然」繪畫比賽，14間特殊學校嘅學生踴躍參加，共頒發26個獎項。所有得獎作品即日起已經喺元朗形點一期商場展出。小妹睇完，覺得各位同學仔都好有創意，無論畫自然環境定動物，都栩栩如生！

新地執行董事郭基泓（見圖）就話，新地一直致力推動環保，自2011年起同綠色力量合辦「新地齊心愛自然」計劃，推廣愛護大自然嘅訊息，近年又推出首個以郊野及海岸清潔為主題嘅流動應用程式「山・灘拯救隊」。而今次繪畫比賽嘅主題為「親親大自然」，係為咗配合新地對環保理念及ESG嘅重視。

新地會將今次比賽中兩份冠軍作品印製成The Point禮品，扣取成本後，將所有收益連同The Point額外捐款，一齊捐畀匡智會。

Kelly Chu