KellyChu - 開心指沙頭角將進一步開放 鄧炳強榮升外父 恨做公公｜Executive日記

Kelly前晚出席活動，碰見保安局局長鄧炳強，炳強哥興致勃勃同小妹透露，話之前右眼感染發炎，差唔多好返喇！最近佢仲有兩件開心事想分享，到底係乜事令局長咁開心呢？其中一件，係佢榮升外父啦。

原來佢上星期六（7日）嫁女，之前仲難得休假幾日辦喜事，期間由副局長卓孝業署理保安局長嘅職務。小妹即刻恭喜佢，戥佢開心！大家都知局長同太太好恩愛，好多活動都拖住手仔一齊出席，sweet到爆。局長同女兒關係好親密，佢之前透露，2006年至2008年借調法國里昂國際刑警秘書處嗰陣，當時得11歲嘅女，就同自己一齊到法國升學，由於太太冇隨行，所以兩父女喺異地享天倫樂。之前講到個女長大、談戀愛，局長就笑住話：「哎……早啲結婚，畀我做公公，我都會好開心㗎」。

另一件喜事，局長話，係該局計劃明年初啟動沙頭角禁區第二期開放計劃，到時市民可以遊覽中英街以外沙頭角所有地方。佢話，沙頭角雖然係一個小地點，但相信會有好多人去，加上疫後好多店舖開門營業，「大家到時一定會睇到好多好嘢」。

Kelly Chu