KellyChu - 3外賣車手出征新鴻基單車節追夢｜Executive日記

由旅發局舉辦嘅2023新鴻基地產香港單車節，將於今個星期日登場。Kelly認識咗3位參加「50公里組」非競賽項目嘅車手，佢哋因為送外賣而變成車友，仲一齊報名參賽，希望發揮外送服務車手優勢，完成個人目標，真係好熱血。

原本陌路嘅3位車手John、Stephen及Raymond（見圖），因活躍於九龍東區送外賣而認識，佢哋喺等外賣期間發現對方都鍾意踩單車同維修單車，結果一拍即合，不時交流單車心得，又約對方單車遊環繞「大冷」，漸漸變成知心車友。

本身係公路車迷嘅Stephen希望挑戰自己，目標一個半鐘內完成項目。曾於摺疊單車比賽獲得亞軍嘅John，自評公路車經驗略有不足，目標緊隨Stephen車尾，笑言可以助佢「破風」。「50公里組」參加者要喺2小時40分鐘內完成項目，大會建議平均時速需達29公里。

Kelly Chu