KellyChu - 第四期超搶手 隨《頭條》《虎報》派發 防騙《提紙》拆解網上投資騙案｜Executive日記

近期騙案不斷，為咗呼籲大眾提防騙子，做個精明人，警方昨日推出防騙刊物《提紙》第四期，隨免費報章《頭條日報》同《英文虎報》（The Standard），喺全港各區派發。同之前幾次一樣，大批市民踴躍取閱！

附有優惠券

《頭條日報》同《英文虎報》共有逾200個派發點，分布港九新界，昨早大批趕返工嘅市民，就算腳步幾匆忙，都特意停一停，攞一份夾住第四期《提紙》嘅《頭條》或《虎報》。市民透過《提紙》，輕輕鬆鬆閱讀幾分鐘，就可以獲取最新防騙資訊及騙案手法。今期主題係「網上投資騙案」，據警方資料，今年首8個月「投資騙案」嘅被騙金額近23億元，比去年同期高出一倍，當中接近8成屬網上投資騙案。

《提紙》又報道，警方推出嘅「防騙視伏器」已錄得超過140萬次搜索，即將加推「防騙視伏App」連接「轉數快」， 協助巿民避免墮入網絡騙案。而案件實錄就提及「JPEX」網上投資騙案，拆解騙徒手法，案中已有超過2500名受害人報案，騙款超過15億元。今期《提紙》亦有提及防騙小錦囊，包括使用「防騙視伏器」評估風險，或如有懷疑，致電18222查詢。

另外，《提紙》下方仲附有優惠券，大家去華潤萬家下屬門市U購select等，購物淨額滿100元，即享9折優惠！

Kelly Chu