KellyChu - 巨型充氣南瓜驚喜登場 「海濱藝遊坊」加場推哈囉喂夜｜Executive日記

發展局喺灣仔舉辦嘅懷舊香港夜市「海濱藝遊坊」，早前宣布加場，噚日起至星期日連續3日再開放市民入場盡興，除咗街頭美食同音樂表演之外，仲加入咗萬聖節主題元素，今晚將有10米高嘅巨型充氣南瓜驚喜登場！

一年一度萬聖節又到，適逢政府推行夜經濟，今個周末可以話越夜越繽紛。喺「海濱藝遊坊」毗鄰灣仔HarbourChill海濱休閒站，呢兩晚以及萬聖節31號當晚嘅6點至10點，將會舉行「濱紛魔法嘉年華」，現場展出高達10米嘅巨型充氣南瓜，小妹已經準備好扮鬼扮馬去打卡。

嘉年華場內亦設有南瓜跳彈床，可以畀小朋友盡情跳躍放電，參加泡泡遊戲更可以有贏得「扭波波」嘅機會。著名魔術師Carson Leung會為大家帶嚟經典「刀鋸美人」魔術，增添驚喜緊張氣氛。鍾意「扮嘢」嘅大人小朋友，可以參加臉部彩繪工作坊，畫上鬼臉trick or treat！

堅尼地城卑路乍灣海濱長廊亦會舉行「堅農夜市•萬聖節+Cosplay」；觀塘海濱嘅「萬聖節寵物之夜」，今晚係最後機會帶同愛寵參加。

Kelly Chu