KellyChu - 叱咤記者會周四昂坪舉行 鏡粉為撐偶像通宵瞓街4日｜Executive日記

樂迷期待已久嘅「2023年度叱咤樂壇流行榜頒獎典禮記者會」，今個星期四將會連續第3年喺昂坪市集舉行，但估唔到今年樂迷嘅熱情咁熾熱，鏡粉等搶先幾日就上山通宵排隊，希望早早攞個靚位，幫偶像打氣！

負責提供場地嘅昂坪360就同Kelly講，今年見到咁多Fans提早幾日去昂坪市集通宵排隊，於是準備咗物資包，幫捱眼瞓既佢哋打打氣！

物資包入面有寶礦力、餅乾充饑；同時考慮到入夜後，昂坪溫度會稍為降低，昂坪360仲準備埋暖包畀佢地保暖添！收到物資包嘅Fans個個都話好窩心！

見到山上人山人海咁熱鬧，小妹昨日都趁機上去睇睇，見到Fans都肯配合現場指揮，守秩序之餘，仲保持地方整潔衞生；現場亦有加派人手維持秩序。希望當日活動順利舉行！

Kelly Chu